Oralda Eskendir Hasanǵalıev ánderin oryndaýshylardyń «Atameken» festıvali bastaldy
ORAL. QazAqparat - Oral qalasynda belgili ánshi-kompozıtor, QR halyq ártisi, Memlekettik syılyqtyń laýreaty, «Otan» ordeniniń ıegeri Eskendir Hasanǵalıev ánderin oryndaýshylardyń ІH halyqaralyq «Atameken» án festıvali bastaldy, dep habarlaıdy «QazAqparat» tilshisi.
BQO ákimdigi, oblystyq mádenıet, muraǵattar jáne qujattama basqarmasynyń qoldaýymen oblystyq halyq shyǵarmashylyǵy ortalyǵy uıymdastyrǵan dástúrli festıvalge Qytaıdan, Reseıdiń Astrahan qalasy, Qazaqstannyń Ońtústik jáne Batys Qazaqstan, Qaraǵandy, Qostanaı, Qyzylorda, Aqtóbe, Atyraý oblystarynan barlyǵy 21 úmitker qatysýǵa tilek bildirdi.
Atalmysh ortalyq dırektory Medhat Qambetovtiń aıtýynsha, aıtýly doda maqsaty - Eskendir Hasanǵalıev týyndylaryn nasıhattaýmen birge qazaq ulttyq estrada ánderin oryndaýshylardyń sheberligin kóterý, talantty jastardyń jolyn ashý.
Qalalyq mádenıet jáne demalys saıabaǵynda jerebe tastaý rásimi ótip, qazylar alqasynyń múshesi, ánshi-kompozıtor, QR eńbek sińirgen qaıratkeri, QR tuńǵysh Prezıdent qory syılyǵynyń laýreaty, P.Chaıkovskıı atyndaǵy Almaty mýzykalyq kolledjiniń dırektory Birjan Hasanǵalıev barlyq úmitkerlerge sáttilik tiledi. Budan keıin qatysýshylar án báıgesindegi óz rettik nómirlerin anyqtap, úlgili «Qyzǵaldaqtar» bı ansamblimen birge flesh-mob bılep, «Atameken» emblemasyna óz qoltańbalaryn qaldyryp, túrli-tústi sharlardy ushyrdy.
Búgin oblystyq qazaq drama teatrynda án alamanynyń birinshi kezeńi ótýde. Keshkisin ákeli-balaly Hasanǵalıevterdiń «Aýylym - ánim» shyǵarmashylyq kontserti qoıylady. 22 maýsym kúni baıqaýdyń ekinshi kezeńi ótip, festıval jeńimpaz-júldegerleri anyqtalady. Óner dodasy gala-kontsertpen qorytyndylanbaq.
