Oralda eskalatordan qulap ketken toǵyz aılyq sábı kóz jumdy

ORAL. QazAqparat – Oral qalasynda eskalatordan qulap ketken toǵyz aılyq sábı kóz jumdy, dep habarlaıdy QazAqparat tilshisi.

BQO densaýlyq saqtaý basqarmasynyń baspasóz qyzmeti málim etkenindeı, dárigerler alǵan sharalarǵa qaramastan, sábı 19 naýryz kúni esin jımastan qaıtys boldy.

Atalǵan sábı 13 naýryzdan beri qalalyq kópbeıindi aýrýhanada jasandy tynys alý apparatyna qosýly boldy. Jaǵdaıy óte aýyr bolǵandyqtan, ota jasalǵan joq.

BQO polıtsııa departamentiniń baspasóz qyzmetiniń habarlaýynsha, osy oqıǵa boıynsha barlyq aqparat QR Qylmystyq is júrgizý kodeksiniń 201-babyna sáıkes jarııa etilmeıdi. Aqparat tek jábirlenýshi taraptyń ruqsatymen jarııa etilýi múmkin.

Eske sala keteıik, budan buryn Oralda toǵyz aılyq sábıdiń eskalatordan qulap ketkenin jazǵan bolatynbyz.