Oralda esirtkimen ustalǵan Atyraý turǵyny polıtseıge para bergen
BQO Polıtsııa departamentiniń resmı ókili Bolatbek Belgibekovtiń aıtýynsha, patrýldik polıtsııa batalonynyń qyzmetkerleri 36 jastaǵy atyraýlyq turǵyndy esirtkimen qolǵa túsirgen. Ol buǵan deıin de isti bolǵany anyqtaldy.
Atalǵan turǵyn QR QK 296-baby 2-bóligine (esirtki, psıhotroptyq zattardy, sol tektesterdi ótkizý maqsatynsyz zańsyz daıyndaý, qaıta óńdeý, ıemdený, saqtaý, tasymaldaý) sáıkes qylmystyq jaýapkershilikke tartpaý úshin ınspektorǵa 10 myń teńge kóleminde para usynǵan. Sóıtip, taǵy bir qylmys jamap alǵan.
Sondaı-aq Oral qalasynda polıtsııa qyzmetkerine para berýdiń taǵy bir faktisi anyqtaldy. «Teletsentr» saıajaı qoǵamy «Saıabaq» dúkeni mańynda «VAZ-21112» avtokóliginiń 29 jastaǵy júrgizýshisi QR Ákimshilik quqyqbuzýshylyq kodeksiniń 593-baby 2-bóligine (jolaýshynyń qaýipsizdik belbeýin taqpaýy) sáıkes jaýapqa tartylmas úshin osyndaı qadamǵa barǵan. Ol patrýldik avtokólik salonynda 2 myń teńge berip, qutylmaq bolǵan.
Qazirgi kezde eki oqıǵa boıynsha QR QK 367-baby 1-bóligine (para berý) sáıkes sotqa deıingi tergeý amaldary júrgizilýde.
«Mundaı qadamǵa barǵandar múlki tárkilenip nemese onsyz, belgili bir laýazymdardy atqarý nemese belgili bir qyzmetpen aınalysý quqyǵynan ómir boıyna aıyryla otyryp, paranyń on eselengennen jıyrma eselengenge deıingi somasy mólsherinde aıyppul salýǵa ne úsh jylǵa deıingi merzimge bas bostandyǵynan aıyrýǵa jazalanady. Adamdar toby bolyp, iri mólsherde nemese birneshe ret para bergenderdiń jazasy odan saıyn aýyrlaı túsedi», - dedi B.Belgibekov.