Oralda esirtkige eltigen kúıde rýlge otyrǵan júrgizýshi ustaldy
ORAL. QazAqparat – Oralda esirtkige eltigen kúıinde rýlge otyrǵan júrgizýshi ustaldy, dep habarlaıdy QazAqparat tilshisi.
BQO polıtsııa departamentiniń resmı ókili Bolatbek Belgibekovtiń málim etkenindeı, júrgizýshi budan buryn kólik júrgizý quqyǵynan aıyrylǵan bolyp shyqty.
Soǵan qaramastan, «VAZ-2114» avtokóligin tizgindegen 1993 jylǵy K. degen júrgizýshi Ábilqaıyr han dańǵyly boıyndaǵy «Týrıst» dúkeni janynda qolǵa tústi. Saraptama qorytyndysyna sáıkes ol esirtkige eltigen kúıinde bolǵan.
K. budan buryn da jaýapqa tartylyp, Oral qalasy mamandandyrylǵan ákimshilik sotynyń sheshimimen júrgizýshi quqyǵynan úsh jylǵa aıyrylǵan bolatyn.
«Endi oǵan QR QK 346-baby 1-bóligine (kólik quraldaryn basqarý quqyǵynan aıyrylǵan jáne alkogoldik, esirtkilik jáne (nemese) ýytqumarlyq masań kúıdegi adamnyń kólik quralyn basqarýy) sáıkes aıyp taǵylyp, sotqa deıingi tergeý amaldary júrgizilýde. Bul bap boıynsha aıypty dep tanylǵan adam bes myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna, ne bir myń eki júz saǵatqa deıingi merzimge qoǵamdyq jumystarǵa tartýǵa, ne bes jylǵa deıingi merzimge bas bostandyǵyn shekteýge, ne sol merzimge bas bostandyǵynan aıyrýǵa jazalanady. Sondaı-aq belgili bir laýazymdardy atqarý nemese belgili bir qyzmetpen aınalysý quqyǵynan ómir boıyna aıyrylady», dedi QazAqparat tilshisine B.Belgibekov.
