Oralda esirtki jasyratyn oryndardy uıymdastyrýmen aınalysqan 16 jasar oqýshy ustaldy
BQO polıtsııa departamentiniń baspasóz qyzmetinen málim etkenindeı, atalǵan qylmys respýblıka aýmaǵynda 1 maýsym men 31 qazan aralyǵynda ótip jatqan «Qarasora-2023» jedel aldyn alý is-sharasy barysynda ashyldy.
BQO PD esirtki qylmysyna qarsy is-qımyl basqarmasynyń jáne Oral qalasy polıtsııa basqarmasynyń qyzmetkerleri jasyryn oryndardy uıymdastyrýmen aınalysqan Oral qalasyndaǵy mektepterdiń birinde 11-synypta oqıtyn 16 jasar jasóspirimdi qolǵa túsirdi.
«Oqýshy qylmys ústinde ustaldy, ony jeke tintý kezinde ishinde erekshe ıisi bar untaq zat salynǵan, jasyl tústi ızolentamen oralǵan 2 qaptama tabylyp, tárkilendi. Onyń uıaly telefonyn tekserý kezinde jasyrý oryndarynyń koordınattary anyqtaldy, sonyń kómegimen ishinde arnaıy ıisi bar untaq salynǵan, jasyl tústi ızolentamen oralǵan 23 qaptama tárkilendi. Saraptama tekserisi boıynsha tárkilengen zattyń salmaǵy 20,18 gramm bolatyn sıntetıkalyq esirtki zaty ekenin anyqtaldy. Kúdiktige qatysty QR QK-niń 297-baby 3-bóligine (esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý) sáıkes sotqa deıingi tergep-tekserý amaldary bastaldy», dep habarlady vedomstvodan.
Departamentten túsken málimetke qaraǵanda, kúdiktige qatysty eshqaıda ketpeý týraly qolhat túrindegi bultartpaý sharasy qoldanyldy.
«Qarasora-2023» jedel aldyn alý is-sharasy barysynda BQO polıtsııa departamentiniń qyzmetkerlerimen esirtki qylmysyna qatysty 94 quqyq buzýshylyq anyqtalyp, sonyń ishinde 44 qylmys pen 55 qylmystyq áreket anyqtaldy.
Eske sala keteıik, budan buryn Batys Qazaqstanda shekaradan zańsyz ótpek bolǵan 95 sheteldik azamattyń ustalǵanyn jazǵan edik.
