Oralda esirtki satýshyny bosatyp jibergen polıtsııa qyzmetkerleri sottaldy
ORAL. QazAqparat - Oralda esirtki satýshyny bosatyp jibergen polıtsııa qyzmetkerleri sottaldy, dep habarlaıdy QazAqparat tilshisi.
Oral qalalyq sotynan túsken málimetke qaraǵanda, 2017 jyldyń mamyrynda Baǵdat Aqqulov iri kólemdegi keptirilgen marıhýanany zańsyz ıemdengen.
Sodan keıin ótkizý maqsatynda esirtkini anasynyń páterinde saqtaǵan.
Oral qalalyq ishki ister basqarmasynyń qyzmetkerleri jasyryn tergeý amaldary barysynda satyp alýshy esebinde B.Aqqulovtan esirtki satyp alǵan. Alaıda polıtsııa qyzmetkerleri ózara kelisip, jalǵan qujattar jasaý jolymen B.Aqqulovtyń múddesine qyzmet etip, ony esirtki satýǵa baılanysty qylmystyq jaýapkershilikten bosatyp jibergen.
Oral qalalyq sotynyń 10 sáýirdegi úkimimen isti júrgizgen tergeýshi Erbol Esekenov QR QK 413-baby, 416-baby 6-bóligi jáne 58-baby 3-bóligine sáıkes aıypty dep tanylyp, 6 jylǵa bas bostandyǵynan aıyrý jazasyn qaýipsizdigi orta qylmystyq-atqarý júıesi mekemesinde óteýge sottaldy. Ol sondaı-aq 4 jylǵa jergilikti ózin-ózi basqarý jáne memlekettik organdarda qyzmet atqarý quqyǵynan jáne polıtsııa kapıtany sheninen aıyryldy.
Jedel ýákil Zaıdolla Qubashev pen Oral qalalyq ishki ister basqarmasynda esirtki bıznesimen kúres bóliminiń bastyǵy bolǵan Maqsat Seıilev aıypty dep tanylyp, 4 jylǵa bas bostandyǵynan aıyrý jazasyn qaýipsizdigi orta qylmystyq-atqarý júıesi mekemesinde óteýge sottaldy. Bul ekeýi 4 jylǵa jergilikti ózin-ózi basqarý jáne memlekettik organdarda qyzmet atqarý quqyǵynan jáne polıtsııa maıory sheninen aıyryldy.
B.Aqqulov QR QK 297-baby 2-bóligine sáıkes 6 jylǵa bas bostandyǵynan aıyrý jazasyn qaýipsizdigi orta qylmystyq-atqarý júıesi mekemesinde óteýge sottaldy. Jaza merzimine onyń ótken jylǵy 30 shildeden 14 qyrkúıekke deıin qamaqta bolǵan merzimi engizildi.
Sot úkimi kúshine engen joq.
Eske sala keteıik, budan buryn BQO-da kıik múıizderin áketip bara jatqan eki adamnyń ustalǵanyn jazǵan bolatynbyz.
