Oralda esirtki satty dep aıyptalǵan turǵyn aqtalyp shyqty
ORAL. QazAqparat - Oralda esirtki satty dep aıyptalǵan turǵyn aqtalyp shyqty, dep habarlaıdy QazAqparat tilshisi.
BQO sotynyń qylmystyq ister jónindegi sot alqasy QR QK 297-baby 1-bóligine baılanysty sottalǵan K-ǵa qatysty iske núkte qoıdy.
Oblystyq sottyń baspasóz qyzmetinen túsken málimetke qaraǵanda, birinshi satydaǵy sottyń úkimimen K. keptirilgen marıhýanany zańsyz ótkizdi dep tanylyp, 6 jylǵa bas bostandyǵynan aıyrý jazasyn qaýipsizdigi ortasha qylmystyq-atqarý júıesi mekemesinde óteýge sottalǵan bolatyn.
Sottalýshy men onyń qorǵaýshysy sot úkimimen kelispeı, apellıatsııalyq shaǵym túsirgen.
Іs materıaldaryna qaraǵanda, K. jasyryn tergeý amaldary (baqylanatyn satyp alý) barysynda salmaǵy 3,64 gramm keptirilgen marıhýanany polıtsııa qyzmetkerleri tartqan búrkenshek esimdi S-ǵa 4 myń teńgege satqan.
Alaıda apellıatsııalyq satydaǵy zertteý bul derek boıynsha jedel qyzmetter tarapynan arandatý oryn alǵanyn kórsetti.
Atap aıtqanda, S. sottalýshyǵa bir kúnniń ishinde bes ret telefon shalyp, odan birneshe márte tabandy túrde esirtki satýdy suraǵan.
K. isti birinshi satyda qaraý barysynda da, apellıatsııalyq alqa otyrysynda da esirtkini jeke óziniń paıdalanýy úshin saqtaǵanyn, ony satatyn nıeti bolmaǵanyn málimdedi. Tek kýániń birneshe ret telefon shalyp, tabandy túrde suraýynan, ıaǵnı onyń tikeleı áser etýi saldarynan satqanyn aıtty.
K-nyń polıtsııa qyzmetkerleriniń aralasýynsyz esirtki satqanyn nemese basqalaı áreket jasaǵanyn rastaıtyn dáleldemeler joq. Іs materıaldarynda K-nyń esirtki satýǵa qatysy barlyǵyn aıqyndaıtyn qajetti negizder joq.
Apellıatsııalyq sot alqasy is materıaldaryn tolyq zerttep, taraptardyń ýájderin tyńdaı kele, birinshi satydaǵy sottyń úkimin ózgertti. K-nyń áreketteri QK 296-baby 2-bóligine qaıta dárejelenip, ol esirtki zattaryn ótkizý maqsatynsyz zańsyz saqtaǵany úshin kináli dep tanyldy. Bul quqyqbuzýshylyq QK 10-babynyń talaptaryna saı qylmystyq teris qylyq bolyp tabylatyndyqtan, oǵan 160 saǵat merzimge qoǵamdyq jumystarǵa tartý túrindegi jaza belgilendi.
K-nyń 8 aıǵa jýyq qamaqta bolǵany eskerilip, atalǵan jaza ótelgen dep eseptelip, ol sot zalynda bosatyldy.
Birinshi satydaǵy sot úkiminiń basqa bóligi ózgerissiz qaldyryldy.
Osylaısha oblystyq sottyń qylmystyq ister jónindegi sot alqasy K-nyń buzylǵan quqyqtaryn qalpyna keltirdi.
Eske sala keteıik, budan buryn komandırin atyp óltirgen polıtsııa qyzmetkerine qatysty sot úkiminiń shyqqanyn jazǵan bolatynbyz.
