Oralda erteńnen bastap qoǵamdyq kólikter júre bastaıdy
ORAL. QazAqparat – Oralda qoǵamdyq kólikter 28 sáýirden bastap qaıta júretin boldy, dep habarlaıdy QazAqparat tilshisi.
Oral qalasynyń ákimi Abat Shynybekovtiń málim etkenindeı, Memleket basshysynyń tapsyrmasyna sáıkes óńirlerde de karantındik shekteý sharalaryn jeńildetý jumystary qolǵa alyndy.
Barlyq baǵyttaǵy avtobýstar tańǵy 06.00-den keshki 19.00-ge deıin qatynaıdy. Tek qoǵamdyq kólik ıeleri men júrgizýshiler sanıtarlyq talaptardy qatań saqtaýy tıis.
Ákimniń sózine qaraǵanda, kóktemgi egý maýsymy bastalǵandyqtan, turǵyndar arasynda saıajaıaǵa barý máselesi jıi qozǵalyp keledi. Kúni búgin qalada 176 baý-baqsha seriktestigi bolsa, sonyń 150-den astamy jumys isteıdi. Saıajaılarda 18 myńnan astam adam turaqty turyp jatyr.
Buǵan deıin saıajaılarǵa senbi jáne jeksenbi kúnderi ǵana barýǵa ruqsat etilgen bolatyn. Endi 28 sáýirden bastap kestege ózgeris engiziledi. Qalada qozǵalys jıiligin saqtaý úshin memlekettik nómiri taq sanmen bastalatyn avtokólikter sársenbi, juma, jeksenbi, jup sanmen bastalatyn kólikter seısenbi, beısenbi, senbi kúnderi saıajaıǵa baryp, saǵat 09.00-den keshki 19.00-ge deıin bola alady. Olardyń qolynda tıisti qujattary bolýy tıis. Kólikte júrgizýshiden basqa eresek úsh adamnan artyq bolmaýy kerek. Balalar da jol qozǵalysy erejelerine saı otyrýy qajet.
Oǵan qosa jasy 65-ten asqan azamattarǵa saıajaıǵa barýǵa ruqsat etiledi. Áıtse de saıajaılarda bógde adamdardyń qatysýymen kópshilik sharalardy uıymdastyrýǵa, jer qopsytýdy qospaǵanda, jaldamaly jumysshylardy tartýǵa tyıym salynady.
Qala basshysynyń aıtýynsha, oblystaǵy iri óndiris oryndary men zaýyttar, memlekettik baǵdarlamalar boıynsha tapsyrysqa sáıkes jumys jasaıtyn kásiporyndar barlyq sanıtarlyq talaptardy saqtaı otyryp, jumystaryn jalǵastyrady.
Sondaı-aq 28 sáýirden bastap avtokólikke qyzmet kórsetetin, janar-jaǵar maı quıý stansalary, qosalqy bólshek satatyn, hımııalyq tazalaý, uıymdastyrý tehnıkasyn jóndeý oryndary ashylady. Basqa kásiporyndar da kezeń-kezeńmen qyzmetine kirisetin bolady.
«Qalada turǵyndarǵa úılerinen alystamaı, serýendeýine bolady. Bul rette jeke qorǵanys quraldaryn umytpaı, qujattaryn ózderimen birge alyp júrý kerek. Úsh adamnan artyq jınalýǵa bolmaıdy. Balalar eresektermen birge bolýy qajet. Serýendegen kezde 2 metr qashyqtyqty saqtaý kerek», dedi Abat Shynybekov.
Eske sala keteıik, budan buryn Oral qalasynda avtobýstar qatynasy toqtatylatynyn, arnaýly áskerı jıynǵa shaqyrylǵan 94 batysqazaqstandyqtyń qyzmetke kiriskenin jazǵan bolatynbyz.
