Oralda erli-zaıyptyny óltirgen turǵyn 20 jylǵa sottaldy
ORAL. QazAqparat - Búgin BQO qylmystyq ister jónindegi mamandandyrylǵan aýdanaralyq sotynyń úkimimen Igor Alekseenko QR QK 99-baby 2-bóligimen 20 jylǵa bas bostandyǵynan aıyryldy, sonyń bes jylyn erekshe tártiptegi túzetý kolonııasynda óteıtin bolady, dep habarlaıdy «QazAqparat» HAA tilshisi.
Sot talqysynda belgili bolǵanyndaı, ótken jylǵy 28 qazanda I.Alekseenko zaıybymen birge jańa tehnıkany «jýǵan» tanystarynyń úıine barady. Sol úıde erli-zaıypty Alekseı men Irına Zaıtsevter de bolady. Ústel basynda sottalýshy ózimen sózge kelgen Irına Zaıtsevanyń júrek tusyna pyshaq salady. Sodan keıin áıelin qorǵamaq bolǵan Alekseıge de keýde tusynan alty ret pyshaq suǵady. Asa qatygezdikpen jasalǵan qylmys Zaıtsevterdiń on jasar uly Maksımniń kózinshe bolǵan.
Sottalýshy óz kinásin moıyndady. Sot sonymen qatar odan jábirlenýshi tarapqa moraldyq zalal retinde 2 mln. teńge óndirdi.
Aıta keteıik, marqumdardyń sońynda eki balasy qaldy, qazir olardy ájesi tárbıeleýde.
