Oralda erikti stýdentter zeınetkerdiń úıin jóndep berdi
ORAL. QazAqparat - Jáńgir han atyndaǵy Batys Qazaqstan ýnıversıtetiniń volonter stýdentteri oraldyq zeınetkerdiń ótinishine ún qatyp, úıine jóndeý jumystaryn júrgizip berdi, dep habarlaıdy QazAqparat tilshisi.
«Samoılova Lıýdmıla Grıgorevna maǵan «Kúnshýaq» baǵdarlamasyndaǵy (jergilikti telebaǵdarlama) volonter jumysyna qatysty suhbatymdy kórip habarlasty. Ájeı jalǵyz turady eken jáne úıin jóndeý úshin kómekke muqtaj. Lıýdmıla Grıgorevna rıza boldy jáne biz de rızamyz. Demalysymyz bosqa ótpedi», - dep jazdy eriktilerdiń kóshbasshysy Móldir Sapar Instagram jelisinde.
Ájeıdiń qońyraýyn «Kúnshýaq» baǵdarlamasynyń avtory Laýra Bekbolatova qabyldaǵan.
«Balalar baǵdarlamaǵa qatysyp, óz qyzmetteri týraly aıtyp berdi. Lıýdmıla Grıgorevna baǵdarlamany kórip, bizden kómek suraý qajet dep sheshken. Osylaısha ájeı maǵan qońyraý shalyp, ózdiginen jóndeý jumystaryn júrgize almaıtynyn aıtty», - dedi QazAqparat tilshisine jýrnalıst L. Bekbolatova.
«Ájeıdiń ótinishi men baılanys telefonyn Móldirge berdim, olar ótinishti qabyldap, ájeıge kómektesti. Qalamyzda osyndaı meıirbandy jastardyń bar ekeni qýantady!».
Volonterlik qyzmet Oral qalasynda keń tarap keledi. Adamdar bir-birine qol ushyn sozýǵa barynsha tyrysýda. Máselen, qala ishindegi «GAZel» júrgizýshisi men kondýktor juma saıyn jolaýshylardy tegin tasý týraly sheshim qabyldaǵan. Ótken aptada bul aktsııaǵa taǵy bir kásipker - Rýslan Serǵazıev te qosylǵan bolatyn. Ol juma kúni ortalyqtardyń septıgin tegin tazartyp bergen.
