Oralda erigen qar sýyna baılanysty turǵyndardan ótinish kóbeıe túsken
ORAL. KAZINFORM – Batys Qazaqstan oblysynda erigen qar sýy turǵyndardy alańdatyp otyr. Turǵyndar áleýmettik jelige júktegen beınejazbalarynda aýla-kóshelerdi sý basqanyn aıtyp, dabyl qaǵyp jatyr.
Oral qalasynda «Qus fabrıkasy» atalyp ketken «Zachaganskıı» baý-baqsha seriktestiginde ata-analar sý joldyń ústimen aǵyp jatqandyqtan, mektepke tasymaldaıtyn avtobýsqa bastaýysh synyp oqýshylaryn jetkizý múmkin emestigin habarlaǵan.
Oral qalasy ákimdiginen alynǵan málimetke qaraǵanda, 8 naýryzdan beri turǵyndardan 266 ótinish túsken. Sonyń ishinde búgin tańnan beri qabyldanǵan 87 ótinish boıynsha sý sorý jumystary júrgizilip jatyr.
Qarǵyn bastalǵannan beri oblys ortalyǵynda 46 myńnan astam tekshe metr sý sorylǵan.
Qalaǵa qarasty Zachagan kentinde Oral-Saratov trassasy janyndaǵy arna arqyly sý qatty aǵyp jatyr. Erigen qar sýyn kedergisiz ótkizý, arnadan asyp ketýin boldyrmaý maqsatynda 13 naýryz kúni munda TJM qyzmetkerleri jumys istedi.
BQO TJ departamenti baspasóz qyzmetinen túsken málimetke qaraǵanda, osy tustan 5 myń tekshe metrdeı sý sorylyp, aıdaldy. Jaǵdaı baqylanýda.
Sol sekildi Báıterek aýdany Beles aýylynda bir úıdi sý basý qaýpi tóngendikten, jol boıynda ýaqytsha kólikter toqtatylyp, sý aǵyzý jumysy júrgizilgen. Bul týraly aýyl adamdary málimdedi.
— Ázirge qaýip joq. Sý basýdyń aldyn aldyq, — dedi Kazinform tilshisine Beles aýyldyq okrýginiń ákimi Baqytgúl Júnisova.
Óńirde sońǵy kúnderi qar kúrt erip jatqandyqtan, qaýip áli seıile qoıǵan joq.
Eske sala keteıik, budan buryn BQO-da Derkól ózenindegi sý deńgeıi bir táýlikte 130 santımetrge kóterilgenin jazǵan bolatynbyz.