Oralda erekshe muqtaj adamdarǵa arnalǵan úı qurylysy bastaldy
ORAL. QazAqparat - «Rýhanı jańǵyrý» baǵdarlamasy aıasynda Oral qalasynda erekshe muqtaj adamdarǵa arnalǵan úı qurylysy bastaldy, dep habarlaıdy «QazAqparat» tilshisi.
Osyǵan oraı qurylys ornynda metsenattar, úkimettik emes uıymdar men saıası partııalar ókilderi qol qoıǵan estelik kapsýlasyn salý rásimine qatysqan oblys ákimi Altaı Kólginov bul jobanyń Alǵys aıtý jáne Assambleıa kúninde bastalyp otyrǵanyn jetkizdi.
«Óńirde sal aýrýyna shaldyqqan 2 myńnan astam bala bar. Sonyń ishinde erekshe kómekti qajetsinetin 500-deı adam bolsa, sonyń kóbi - jastar. Estelik kapsýlasyn salý rásimin 1 naýryz kúni ótkizýimiz tegin emes. Bul qos birdeı merekemizben tuspa-tus kelip otyr. Munyń bári - Memleket basshysy júrgizip otyrǵan salıqaly saıasattyń, el birliginiń jemisi. Úkimettik emes uıymdardyń usynysymen qolǵa alynǵan osynaý mańyzdy joba «Rýhanı jańǵyrý» baǵdarlamasy aıasynda metsenattardyń qoldaýymen júzege asqaly otyr. Sondyqtan Alǵys aıtý kúninde, ásirese, osy úıdi turǵyzýǵa qolushyn beremin degen azamattardyń bárine, qurylysshylarǵa, kásipkerler men depýtattarǵa, «Nur Otan» partııasy múshelerine rızashylyǵymdy bildiremin», dedi óńir basshysy.
Atalmysh nysan tolyqtaı metsenattardyń qarjysyna salynbaq. Joba quny - 100 mln teńge.
Múmkindigi shekteýli jandarǵa arnalǵan saýyqtyrý, beıimdeý úıi 50 adamǵa eseptelgen. Tórt bóliktiń árqaısysynda 13 adamǵa deıin tura alady, olar úshin barlyq qolaıly jaǵdaı jasalady.
Qos qabatty úıdi aldaǵy jyldyń maýsym aıynda paıdalanýǵa berý kózdelýde.
