Oralda er adam satýshy áıeldi qyzynyń kózinshe pyshaqtap ketti
ORAL. QazAqparat – Oralda aqtóbelik turǵyn pyshaqtaǵan satýshy áıel jansaqtaý bóliminde jatyr, dep habarlaıdy QazAqparat tilshisi.
BQO polıtsııa departamentiniń resmı ókili Bolatbek Belgibekovtiń málim etkenindeı, oqıǵa 9 maýsym kúni shamamen saǵat 23.00-de Zachagan kentindegi azyq-túlik dúkeninde boldy.
Aqtóbe qalasynyń 1984 jylǵy O. degen turǵyny 36 jastaǵy A. esimdi satýshy áıelge shabýyl jasaǵan.
BQO polıtsııa departamentiniń aǵa anyqtaýshysy Altynbek Temirlanov jumystan qaıtyp kele jatyp, toǵyz qabatty úıdiń birinshi qabatynda ornalasqan dúkennen qashyp shyqqan er adamdy, sońynan aıqaılaǵan áıeldi kóredi. Ol sol boıda polıtsııaǵa habar berip, ózi qýyp jetip, qarsylyq kórsetkenine qaramaı, er adamdy ustaıdy. Keıin er adam kelip jetken «Úki» túngi polıtsııa tobynyń qolyna tústi.
B.Belgibekovtiń aıtýynsha, beınebaqylaý kamerasyn qaraǵan kezde O. men A-nyń bir-birimen sózge kelgeni kórinedi. Buǵan ekinshi satýshy men jábirlenýshiniń qyzy kýá bolǵan. O. ekinshi satýshyny ıterip jiberip, jábirlenýshini pyshaqtap, dúkennen shyǵyp ketken.
Jábirlenýshi oblystyq kópbeıindi aýrýhananyń jansaqtaý bólimine jatqyzyldy.
«Aldyn ala málimetke qaraǵanda, kúdikti men jábirlenýshi bir-birimen úsh jyldaı jaqyn qarym-qatynasta bolǵan. Aqtóbeden birneshe kúnge kezdesýge kelgen. Sodan keıin satýshynyń jumys ornyna baryp, qyzǵanysh negizinde ózimen birge alyp júrgen pyshaqty jumsaǵan. Qylmysty jasaý kezinde ol mas kúıinde bolǵan, buryn sottalmaǵan, esh jerde jumys istemeıdi. Tolyq aqparat sotqa deıingi tergeý amaldary aıaqtalǵannan keıin beriledi», dedi QazAqparat tilshisine B.Belgibekov.
Qazirgi kezde kúdikti ýaqytsha ustaý ızolıatoryna qamaldy.
Oblystyq densaýlyq saqtaý basqarmasynyń baspasóz qyzmeti áıeldiń jaǵdaıy aýyr, jansaqtaý bóliminde ekendigin rastady.
Eske sala keteıik, budan buryn BQO-da Oral-Aqsaı jolynda polıtsııa qyzmetkeriniń mert bolǵanyn, Oralda er adamnyń velosıpedten qulap, kóz jumǵanyn jazǵan edik.
