Oralda er adam balasyna qatygezdik kórsetken

ORAL. KAZINFORM - Oral qalasynda er adamnyń balasyna qatygezdik kórsetkeni jóninde áleýmettik jelide aqparat tarady.

Burynǵy áıeliniń sózine qaraǵanda, kúıeýi balasyn qamap ustap, tilin kálımaǵa keltirýden bas tartqany úshin urǵan. Sonyń saldarynan bala sóıleýden qalǵan, oǵan medıtsınalyq dıagnoz qoıylǵan. Polıtsııaǵa shaǵym túsirse de, er adam jazalanbaǵan.

- Oǵan qosa jumyssyz retinde tirkelip, tabysyn da, dúnıe-múlkin de jasyryp otyr, - delingen Telegramda taralǵan aqparatta.

https://t.me/egovpress/9366

BQO polıtsııa departamenti baspasóz qyzmetiniń naqtylaýynsha, 2021 jyly dinı nekede turǵan áıel men er adam arasynda turmystyq janjaldar oryn alǵan. Áıeldiń ótinishi boıynsha polıtsııa tarapynan er adamǵa qatysty qorǵaý nusqamasy shyǵarylǵan.

2021 jylǵy maýsym aıynda áıel Oral qalasyndaǵy daǵdarys ortalyǵynda turǵan, keıin Taraz qalasyna kóship ketken.

Qazirgi ýaqytta anasy men balasy Tarazda turady. Bala túzetý-ońaltý baǵytyndaǵy balabaqshaǵa barady.

- Polıtsııa balalarǵa qatysty kez kelgen zorlyq-zombylyq faktileri boıynsha zańnamaǵa sáıkes qatań sharalar qabyldanatynyn eskertedi. Atalǵan jaǵdaı BQO polıtsııa departamenti basshylyǵynyń baqylaýynda, - dep habarlady vedomstvodan.

Eske sala keteıik, budan buryn Almaty turǵyny jasaǵan quqyq buzýshylyq úshin oraldyq júrgizýshige aıyppul kelgenin jazǵan bolatynbyz.