Oralda emhana aldyndaǵy skver máselesi qaıta kóterildi
ORAL. KAZINFORM — Oralda №1 qalalyq emhana aldyndaǵy skverdiń taǵdyry talqyǵa tústi.
«Batys Qazaqstan ekologııalyq geografııalyq qoǵamy» qoǵamdyq birlestiginiń tóraǵasy Darhan Sarıevtiń málim etkenindeı, atalmysh shaǵyn saıabaqty saqtap qalý máselesi eki jyldan beri kóterilip keledi.
Onyń sózine qaraǵanda, oblystyq densaýlyq saqtaý basqarmasy tarapynan emhanaǵa qosymsha ǵımarat skverdiń esebinen salynbaqshy. ıAǵnı saıabaqtaǵy aǵashtar kesiledi.
- Basqarma ókilderi ǵımarat salý qajettigin Derkól kenti turǵyndarynyń teń jartysy №1 emhanaǵa tirkelgendigimen túsindirgisi keledi. Alaıda bul emhana ortalyqta ornalasqandyqtan, kent turǵyndary úshin qolaısyz. Endeshe, Derkól turǵyndaryn oǵan irgeles «Aqjaıyq» shaǵynaýdanynda salynyp jatqan emhanaǵa nege bekitpeske!? Ekinshiden, eldi mekenderdi abattandyrý týraly normatıvtik-qujattyq aktige sáıkes ǵımarat aýmaǵynyń 50-60 paıyzy jasyl jelekpen kómkerilýi tıis. Skver esebinen qurylys salynǵan jaǵdaıda bul atalǵan normatıvke qaıshy keledi, - deıdi D.Sarıev.
Onyń aıtýynsha, mundaı skver oblystyq aýrýhananyń aýlasynda da bar. Bul patsıentterdiń demalyp otyrýy úshin óte qajet. Atalmysh máseleni basqasha sheshýge bolady. Mysaly, Qurmanǵazy kóshesi boıyndaǵy eki balalar aýrýhanasy ǵımaraty kezinde basqa mekemelerge berilip ketti. Sol sekildi qalada bos turǵan ǵımarattar bar. Mine, osylardy oblystyq densaýlyq saqtaý basqarmasynyń teńgerimine berip, qaıta quryp nemese kúrdeli jóndep, emhanany sonda ornalastyrýǵa bolady.
Atalmysh máselege baılanysty Kazinform tilshisi Oral qalasy ákimdigine arnaıy suraý salǵan edi.
Ákimdik málimetinshe, emhana aýmaǵynda jańa ǵımarat salý jumystary josparlanýyna baılanysty qurylys máseleleri oblystyq densaýlyq saqtaý basqarmasynyń quzyretine jatady.
Aǵashtardy kesý máselesine qatysty ákimdik janyndaǵy ekologııalyq keńestiń tıisti sheshimi bar. Jańa ǵımarattyń qurylysyna baılanysty jalpy 15 aǵashty kesý josparlanǵan, olardyń qatarynda qýraǵan jáne aýrý aǵashtar da bar.
- Kesilgen aǵashtardyń ornyn toltyrý maqsatynda emhana aýmaǵynda jáne qalanyń basqa da aýmaqtarynda shamamen 200 túp aǵash otyrǵyzylady. Barlyq jumystar qoldanystaǵy ekologııalyq talaptar men belgilengen normalarǵa sáıkes júzege asyrylatyn bolady, - delingen resmı jaýapta.
Arnaıy suraý BQO densaýlyq saqtaý basqarmasyna da joldandy. Basqarma ókilderi aqparattyń keıin beriletinin jetkizdi.
Eske sala keteıik, budan buryn Oralda emhana aldyndaǵy eski skver joıylyp kete me, osyǵan baılanysty ákimdik jaýabyn bergen edik.
