Oralda emhana aldyndaǵy eski skver joıylyp kete me – ákimdik jaýaby
ORAL. KAZINFORM – Oral qalasy ortalyǵynda ornalasqan № 1 emhana aldyndaǵy eski skverdiń joıylý qaýpi bar.
«Batys Qazaqstan ekologııalyq geografııalyq qoǵamy» qoǵamdyq birlestiginiń tóraǵasy Darhan Sarıevtiń Instagram áleýmettik jelisindegi paraqshada málim etkenindeı, oblystyq densaýlyq saqtaý basqarmasy atalmysh emhanany sonyń aldyndaǵy shaǵyn skver esebinen qaıta qurýdy josparlaǵan.
Onyń sózine qaraǵanda, halyqqa medıtsınalyq qyzmet kórsetý sapasyn jaqsartý kerek, biraq qoǵamdyq skverdi joıý esebinen emes.
— Qalalyq sáýlet bóliminiń kelisim bergeni tańdandyrady. Sondaı-aq Oral qalasy turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń basshysy Abylaı Nurmaqov ekologııa belsendilerimen aqyldaspastan, kópjyldyq shyrsha men qaraǵaılardy kesýge qalaısha ruqsat beredi? Jalpy, qalada eski saıabaqtardy saqtap qalý máselesi ótkir tur. Sońǵy 20 jyl ishinde Oral shahary birneshe saıabaqtan aıyryldy. Atap aıtqanda, D. Fýrmanov baǵy ornynda «Atrıým» saýda ortalyǵy, ortalyq bazar mańynda sondaı jerde bank pen gaz kompanııasynyń ǵımaraty, «Zıg-zag» aýdanynda kommertsııalyq dúkender, «Álem Plaza» saýda ortalyǵy janynda kópqabatty úı men gúlder dúkeni salyndy. Eger muny toqtatpasaq, № 36 orta mektepte bolǵan jaǵdaı qaıtalanady -, dedi D. Sarıev.
Osyǵan baılanysty Oral qalasy ákimdiginen mynadaı jaýap keldi.
Oral qalasy turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi BQO máslıhatynyń 2023 jylǵy 31 mamyrdaǵy № 3-10 sheshimimen bekitilgen Batys Qazaqstan oblysynyń jasyl ekpelerdi kútip-ustaý jáne qorǵaý qaǵıdalaryna sáıkes jasyl ekpelerdi tekserý aktisin bergen.
Atalmysh bólimniń málimetine qaraǵanda, № 1 qalalyq emhananyń negizgi ǵımaratyn qaıta qurý nysanynyń tapsyrys berýshisi — BQO qurylys basqarmasy.
— Batys Qazaqstan oblysynyń jasyl ekpelerdi kútip-ustaý jáne qorǵaý qaǵıdalaryna sáıkes aǵashtardy kesý úshin elektrondy úkimettiń veb-portalynda (www.egov.kz, www.elicense.kz) «Aǵashtardy kesýge ruqsat berý» memlekettik qyzmetin kórsetýge qajetti qujattarmen ótinim berilýi kerek. Ókildi organnyń ruqsaty boıynsha aǵashtar kesilgen kezde on ese kólemde qalpyna keltirý jumystary júrgiziledi. Sonymen qatar jeke jáne zańdy tulǵalardyń kepildi hatyna sáıkes eki jyl boıyna (jersiný ýaqyty) kóshetterdi kútip-ustaý jáne qorǵaý is-sharalary atqarylady — dep habarlady vedomstvodan.
Eske sala keteıik, budan buryn aǵashtardyń orynsyz kesiletinin aıtqan oraldyq ekologtyń kógaldandyrý máselesin kótergenin jazǵan bolatynbyz.