Oralda elektr baǵanynyń basyna shyǵyp, sekirmek bolǵan 17 jastaǵy qyz qutqaryldy
ORAL. QazAqparat – Oralda elektr baǵanynyń basyna shyǵyp, sekirmek bolǵan 17 jastaǵy qyz qutqaryldy, dep habarlaıdy QazAqparat tilshisi.
BQO polıtsııa departamentiniń resmı ókili, polıtsııa polkovnıgi Bolatbek Belgibekovtiń málim etkenindeı, oqıǵa 18 naýryz kúni keshkisin oryn aldy.
Saǵat 20.10-da Qazaqstan men Isataı batyr kósheleriniń qıylysynda joǵary voltty temir baǵannyń basynda jasóspirim qyzdyń sekirmek bolyp otyrǵany jóninde 102 telefonyna qońyraý shalynǵan.
Oqıǵa ornyna polıtsııa jáne TJ departamenti qyzmetkerleri jetti. Sodan keıin sol aýdan elektr qýatynan ajyratyldy. Keıin mektep dırektory da keldi.
Saǵat 21.45-te qutqarýshylar baǵanǵa shyǵyp, qyzdy aman-esen túsirip aldy.
«2002 jylǵy E. esimdi jasóspirim keshki mektepte oqıdy. Qaraýsyzdar sanatyna jatatyn qyz ıývenaldy polıtsııa esebinde turady. Birneshe ret úıinen qashyp ta ketken. Oqıǵanyń jaı-japsary anyqtalý ústinde», dedi QazAqparat tilshisine B.Belgibekov.
BQO TJ departamenti zilzalalardyń qaýip-qaterin azaıtý jáne azamattyq qorǵaý salasyndaǵy baqylaý basqarmasynyń bastyǵy Erlan Tóregeldıevtiń naqtylaýynsha, jedel qutqarý jasaǵynan 4 adam, 1 tehnıka bardy.
Sýıtsıdke jol bermegen jedel qutqarý jasaǵynyń bas qutqarýshy-psıhology Nurmuhan Jumaǵalıevti erekshe atap ótken jón.
Qutqarylǵan qyz jedel járdem brıgadasyna tapsyryldy.
