Oralda eldik mereke Memlekettik Týdy kóterýden bastaldy
ORAL. KAZINFORM — Búgin Oral qalasyndaǵy Tuńǵysh Prezıdent alańynda 25 qazan — Respýblıka kúnine oraı Memlekettik Tý kóterý rásimi ótti, dep habarlaıdy BQO ákiminiń baspasóz qyzmeti.
Oǵan oblys ákiminiń mindetin atqarýshy Tilepbergen Kaıýpov, quqyq qorǵaý organdarynyń ókilderi, áskerı qyzmetshiler, qala turǵyndary men qonaqtary qatysty.
Saltanatty rásim Qazaqstan Respýblıkasynyń Memlekettik Ánuranymen bastalyp, kók baıraǵymyz bıikke kóterildi.
Respýblıka kúni — elimizdiń egemendik jolyndaǵy tarıhı tańdaýyn aıshyqtaıtyn, ulttyq birlik pen memlekettilik qundylyqtaryn dáripteıtin mereke. 1990 jylǵy 25 qazanda Qazaq KSR-iniń Memlekettik Egemendigi týraly deklaratsııa qabyldanyp, táýelsiz Qazaqstannyń qalyptasýyna negiz qalandy.
Memleket basshysy Qasym-Jomart Toqaevtyń bastamasymen 2022 jyly Respýblıka kúnine ulttyq mereke mártebesi qaıtaryldy. Bul sheshim tarıhı sanany jańǵyrtyp, eldik murat pen táýelsizdik qundylyqtarynyń mańyzyn arttyra tústi.
Bıylǵy mereke Qazaqstan Respýblıkasy Táýelsizdiginiń 35 jyldyǵy qarsańynda atalyp ótýde. Osy jyldar ishinde elimiz memlekettiligin nyǵaıtyp, qoǵamdyq ómirdiń túrli salasynda mańyzdy jetistikterge qol jetkizdi.
Memlekettik Tý kóterý rásimi patrıottyq ánder shyrqalǵan merekelik kontserttik baǵdarlamamen jalǵasty.
