Oralda Elbasy úndeýi eńbek ujymynda talqylandy
Eńbek ujymy aldynda oblystyq máslıhat hatshysy Málik Qulshardyń atap ótkenindeı, saıası reforma búkilhalyqtyq talqylaýǵa usynylyp otyr. Sondyqtan ár azamattyń óz pikirin erkin bildirip, naqty usynys engizýine múmkindigi bar. Qazaqstan Prezıdentiniń jańa bastamasy memleket pen halyqtyń maqsat-múddesine tolyq saı keledi.
Kezdesýde sóz alǵan oblystyq máslıhat depýtaty, atalmysh kásiporyn dırektorynyń orynbasary Temirǵalı Eskendirovtiń aıtýynsha, bul reforma memlekettik basqarý júıesin tıimdi ete túsip, barlyq bılik tarmaqtarynyń jaýapkershiligin kúsheıtedi. Eń bastysy, ómirdiń barlyq salasynda ilgerileý bolsa, odan barsha halyq utary anyq.
Aıta keteıik, «Agroprodýkt LTD» JShS elimiz boıynsha et óńdeý salasyndaǵy jetekshi kásiporyndardyń biri. Onyń saýda belgileri Reseıde de keńinen tanymal. Kompanııa qazirgi zamanǵy tehnologııa negizinde óz óndirisin keńeıtpek nıette.
«Bıyl kásiporyn júzege asyratyn jańa jobalardyń biri - Zelenov aýdany Peremetnyı aýyldyq okrýginde salynyp jatqan, jylyna 6 myń tonna qus etin (broıler) óndiretin fabrıka qurylysy. Qazirgi kezde joba 40 paıyzǵa eńserilgen. Jyl aıaǵyna qaraı fabrıkany iske qosý kózdelýde», dedi kásiporyn dırektorynyń orynbasary Asan Sultanǵalıev.
