Oralda «El ishi - óner kenishi» atty respýblıkalyq televızııalyq baıqaýynyń oblystyq kezeńi márege jetti

Oblystyq  halyq shyǵarmashylyǵy ortalyǵynan túsken málimetke qaraǵanda, «El ishi - óner kenishi» baıqaýy aıasynda aldymen oblystyq qazaq drama teatrynda 18 maýsym kúni ótken «halyqtyq» jáne «úlgili» ataǵy bar bı ujymdary arasyndaǵy oblystyq bı festıvaline qatysqandar ishinen úzdikteri iriktelip, baıqaýdyń ekinshi aınalymyna, gala-kontsertke jiberildi. «Aqjaıyq» fýtbol klýbynyń stadıonynda bolǵan gala-kontsertten keıin qazylar alqasynyń sheshimimen halyqtyq «Aqjaıyq» bı ansambli (jetekshisi Ásel Dáýletova) jeńimpaz atansa, úlgili «Qyzǵaldaqtar» (Raıhan Qojekesheva) jáne «Nazerke» (Aınur Muqanǵalıeva, Bórli aýdany) bı ansamblderi ekinshi oryndy bólisti. Halyqtyq «Kerim-aı» (Qarlyǵash Qadyrbekova, Qaratóbe aýdany) jáne «Qarlyǵash» (Meıramgúl Dúısenǵalıeva, Qaztalov), sondaı-aq úlgili «Symbat» (Lázzat Qubaeva, Aqjaıyq) bı ansambli úshinshi orynǵa ıe boldy.

Sondaı-aq 19 maýsym kúni oblystyq qazaq drama teatrynda beıneleý jáne sándik qoldanbaly óner sheberleriniń kórmesi qoıylyp, óńir kórkemónerpazdarynyń gala-kontserti boldy.

Qazaqstanda keń aýqymda ótip jatqan sharanyń basty maqsaty - halyq ónerin nasıhattaýmen birge el ishinen júzden júırik shyqqan úzdikterdi anyqtaý. Qazylar alqasyna tóraǵalyq etken belgili ánshi-kompozıtor, Qazaqstan halyq ártisi Altynbek Qorazbaevtyń atap ótkenindeı, úlken sahnalarda óner kórsetýge laıyqty talanttar Batys Qazaqstan oblysynda da bar. Bı ansamblderi men dástúrli ánshilerge qosa respýblıkalyq, halyqaralyq baıqaýlarda kózge túsip júrgen jańaqalalyq Erbol Aqbasovty aıtýǵa bolady.

Atalmysh óner dodasynda báıgeden kelgender qarasha aıynda Astana qalasynda ótetin respýblıkalyq baıqaýǵa qatysatyn bolady.