Oralda eki kólik soqtyǵysyp, 2 adam aýrýhanaǵa tústi
ORAL. QazAqparat – Oralda eki avtokólik túıisip, eki adam aýrýhanaǵa jetkizildi, dep habarlaıdy QazAqparat tilshisi.
BQO Polıtsııa departamentiniń baspasóz qyzmeti málim etkenindeı, búgin saǵat 11.55-te qala ortalyǵynda «Solıarıs» jáne «Lada Largýs» avtokólikteri soqtyǵysty.
Oqıǵa Saraıshyq jáne Muhıt kósheleriniń qıylysynda boldy.
Qazirgi kezde oqıǵanyń mán-jaıy anyqtalyp jatyr.
«Jedel járdem saǵat 12.01-de shaqyrtylyp, brıgada bes mınýttan keıin jetti. Aldyn ala málimet boıynsha, 26 jastaǵy qyz bas pen mıdyń jabyq jaraqatyn alyp, mıy shaıqalǵan. 29 jastaǵy jigittiń eki qabyrǵasy synǵan. Ekeýi de oblystyq kópbeıindi aýrýhanaǵa jetkizildi»,- dep habarlady oblystyq Densaýlyq saqtaý basqarmasynan.
