Oralda eki emhanaǵa jańa jedel járdem kólikteri tabys etildi
ORAL. QazAqparat – Oralda qalalyq eki emhanaǵa jańa jedel járdem kólikteri tabys etildi, dep habarlaıdy QazAqparat tilshisi.
Bul kómek «Samuryq-Qazyna» AQ men QR Densaýlyq saqtaý mınıstrligi arasyndaǵy yntymaqtastyq týraly memorandým aıasynda kórsetildi.
«Samuryq-Qazyna» AQ kompanııalar tobynyń biryńǵaı qaıyrymdylyq operator – «Samruk-KazynaTrust» áleýmettik jobalardy damytý qory» arqyly Batys Qazaqstan oblysyna 4 ókpeni jasandy jeldetý quraly, 30 ottegi kontsentratory, 60 pýlstik oksımetr jáne «Shevrolet Damas» markaly eki jedel járdem kóligi jetkizildi
Oblystyq kópbeıindi aýrýhana dırektory Arman Baıdeýovtiń aıtýynsha, «Samuryq-Qazyna» AQ men «Samruk-Kazyna Trust Fund» tarapynan járdem ýaqtyly kórsetilip otyr.
«Bul jabdyqtardyń barlyǵy koronavırýspen kúreste óte qajet. Osylaısha birlesken is-qımyl nátıjesinde alda bolýy yqtımal indettiń ekinshi tolqynyna tolyq daıyndala alamyz dep oılaımyz. Sonymen qatar bul qurylǵylar basqa da aýrýmen syrqattanatyn naýqastardy emdeý úshin de kerek», dedi A.Baıdeýov.
Jedel járdem kólikteriniń birin alǵan №1 qalalyq emhana dırektory Svetlana Ermekqalıeva da demeýshilerge alǵysyn bildirip, endi dárigerler jumysynyń jedeldigi arta túsetinin jetkizdi. Emhanada osyǵan deıin jumys jasap kele jatqan birneshe jedel járdem kóligi indetpen kúres kezinde tıimdiligin kórsetti. Barlyq qajetti qural-jabdyqpen jasaqtalǵan jańa jedel járdem kóligimen de dárigerler shaqyrtý boıynsha tez baryp, kerek bolǵan jaǵdaıda naýqastardy aýrýhanaǵa ýaqtyly apara alady.
«Bul sharalardyń barlyǵy medıtsına mekemelerine juqpaly aýrýlarǵa, sonyń ishinde COVID-19 indetine qarsy turýǵa járdemdesedi. Basty maqsat – ulttyq densaýlyq saqtaý júıesin nyǵaıtý», dedi «Samuryq-Qazyna Trast» qorynyń resmı ókili Mıras Іrgebaev.
Atalǵan memorandým aıasynda Qazaqstannyń medıtsınalyq mekemelerine barlyǵy 100 jedel járdem kóligi, 1000 ottegi kontsentratory, 50 jeldetkish jáne 1000 pýlstik oksımetr jetkizilgen.
Eske sala keteıik, budan buryn BQO-nyń Fedorov aýylynda karantın jarııalanǵanyn jazǵan bolatynbyz.
