Oralda eki avtokólik soqtyǵysyp, júrgizýshi qaza tapty
ORAL. QazAqparat – Oralda eki avtokólik soqtyǵysyp, júrgizýshi qaza tapty, dep habarlaıdy QazAqparat tilshisi.
BQO Polıtsııa departamentiniń resmı ókili Bolatbek Belgibekovtiń málim etkenindeı, oqıǵa 20 naýryz kúni shamamen saǵat 19.45-te boldy.
Onyń sózine qaraǵanda, «VAZ-2110» avtokóligi Derkól aýyly jaqtan kele jatyp, «Oktan» janar-jaǵar maı quıý stansasy tusynda Saratov jolyna burylar tusta qarsy betke shyǵyp ketken. Sóıtip «Gazel» avtokóligimen túıisken.
«Jol apaty saldarynan «VAZ-2110» avtokóliginiń júrgizýshisi oqıǵa ornynda qaza tapty. Qazirgi kezde QR QK 345-babyna sáıkes sotqa deıingi tergeý amaldary júrgizilýde», dedi B.Belgibekov.
BQO TJ departamenti baspasóz qyzmetiniń naqtylaýynsha, qutqarýshylar «VAZ-2110» avtokóliginen qaıtys bolǵan adamdy shyǵarǵan. Sondaı-aq jol-kólik oqıǵasy saldarynan janar-jaǵar maı tógilgen. Sondyqtan apattyq-qutqarý jumystaryn júrgizý jáne órt qaýipsizdigin qamtamasyz etý úshin qutqarýshylar (2 tehnıka, 11 adam) óz qyzmetterin atqardy.
Eske sala keteıik, budan buryn Batys Qazaqstanda birneshe avtokólik soqtyǵysyp, júrgizýshi jaraqat alǵanyn, birneshe baǵyttaǵy joldyń jabyq ekendigin jazǵan bolatynbyz.
