Oralda eki avtobýs túıisip, 5 adam jaraqat aldy
ORAL. QazAqparat – Oral qalasynda eki avtobýs túıisip, bes adam jaraqat aldy, dep habarlaıdy QazAqparat tilshisi.
BQO polıtsııa departamentiniń resmı ókili Bolatbek Belgibekovtiń málim etkenindeı, oqıǵa búgin tańmen saǵat 08.45-te Ábilqaıyr han dańǵylynda boldy.
Tsıolkovskıı aıaldamasy tusynda №22 jáne №1 baǵytta júretin avtobýstar soqtyǵysty.
Sonyń saldarynan bes adam túrli jaraqat alyp, aýrýhanaǵa jetkizildi.
Oqıǵa ornynda polıtsııa qyzmetkerleri jumys jasady.
Oblystyq densaýlyq saqtaý basqarmasynyń baspasóz qyzmeti naqtylaýynsha, 16 jastaǵy jasóspirim, sondaı-aq 50 jastaǵy áıel, 37 jastaǵy eki er adam jabyq bas-mı jaraqatyn alyp, mılary shaıqalǵan. Qosymsha basqa da jaraqattarmen olar oblystyq kópbeıindi aýrýhanaǵa jetkizildi. 30 jastaǵy ekiqabat áıelge júktiligin úzý qaýpi tóngen. Ol qalalyq kópbeıindi aýrýhanaǵa jatqyzyldy.
Qazirgi kezde oqıǵanyń jaı-japsary anyqtalý ústinde.
Eske sala keteıik, budan buryn Oralda jol apatynan polıtsııa qyzmetkeriniń jaraqat alǵanyn jazǵan bolatynbyz.
