Oralda eki adamdy óltirgender uzaq merzimge sottaldy
ORAL. QazAqparat - BQO qylmystyq ister jónindegi mamandandyrylǵan aýdanaralyq sotta eki adamdy óltirgenderge qatysty úkim shyqty, dep habarlaıdy QazAqparat tilshisi.
Atalǵan sottan túsken málimetke qaraǵanda, ótken jylǵy 5 qazan kúni túnde Arman Qamıev tanystary Bekbolat Hamzın, Rýslan Sáńkibaev jáne Anatolıı Vasılevpen (R.Sáńkibaevtyń tanysy) H.Chýrın kóshesi 162-úıdiń 43-páterinde birge otyryp, araq ishken.
Araq ishý barysynda B.Hamzın qasyndaǵylarǵa aqsha tabýdyń amaly retinde marıhýana satýmen aınalysaıyq dep usynys aıtqan. Sol kezde R.Sáńkibaev masań kúıde buǵan qarsy shyǵyp, ekeýi sózge kelgen. Olarǵa arasha túskisi kelgen A.Vasılevti de R.Sáńkibaev esh sebepsiz betinen uryp-soǵyp, jerge qulatqan. A.Qamıev (ol da mas bolǵan) R.Sáńkibaevtyń qasaqana adam óltirýge baǵyttalǵan qylmystyq áreketin qoldap, jerde jatqan B.Hamzın men A.Vasılevke aıaq-qolyn birdeı jumsap, birneshe soqqy jasaǵan. Onymen tynbaı, A.Qamıev alıýmınıı tabamen A.Vasılevtiń basynan jáne basqa jerinen urǵan. Sodan keıin ekeýi oqıǵa bolǵan jerden boı tasalaǵan. Al B.Hamzın men A.Vasılev sol jerde jan tapsyrǵan.
Sot úkimimen A.Qamıev QR QK 99-baby 2-bóligi 1, 7-tarmaqtaryna sáıkes (eki nemese odan kóp adamdy óltirý) aıypty dep tanylyp, ol 16 jyl bas bostandyǵynan aıyrý jazasyn qaýipsizdigi joǵary qylmystyq-atqarý júıesi mekemesinde óteýge sottaldy.
R.Sáńkibaev QR QK 99-baby 2-bóligi 1, 7-tarmaqtary jáne 188-baby 1-bóligine (urlyq) sáıkes aıypty dep tanylyp, oǵan 15 jyl 6 aıǵa bas bostandyǵynan aıyrý jazasyn qaýipsizdigi joǵary qylmystyq-atqarý júıesi mekemesinde óteý kesildi.
Úkim zańdy kúshine engen joq.
Eske sala keteıik, budan buryn eki adamdy óltirdi degen kúdiktilerdiń ustalǵanyn jazǵan bolatynbyz.
