Oralda Ekaterına Larıonova oqyǵan sport-ınternat jańadan salynady
ORAL. QazAqparat - Oral qalasynda sportqa daryndy balalarǵa arnalǵan mamandandyrylǵan oblystyq mektep-ınternat ǵımaraty jańadan salynady.
Bul týraly búgin osy mekteptiń jaı-kúıimen tanysqan oblys ákimi Altaı Kólginov málim etti, dep habarlaıdy «QazAqparat» tilshisi.
Óńir basshysynyń aıtýynsha, jańa ǵımarat Oralǵa qarasty Derkól kentindegi «Oral» sport kesheni janynan turǵyzylmaq. Onda qazirgi zamanǵy talaptarǵa sáıkes 300 oryndyq ınternat, úlgi jobadaǵy sport kesheni oryn teppek. Aldaǵy ýaqytta ony kolledjge aınaldyrý oılastyrylatyn bolady.
Sport ınternattyń qazirgi ǵımaraty óte tar ári eski. 1964 jyly balabaqsha retinde salynǵan ǵımaratta sport ınternat 2004 jyly ashylǵan bolatyn. Osy ǵımaratqa qosa basqa sport zaldardy jaldaý úshin bıýdjetten jyl saıyn 60 mln. teńgege jýyq qarjy jumsalýda. Munyń tıimsiz ekeni belgili. Onyń ornyna jańa ǵımarat salsa, tolyǵymen aqtaıtyny sózsiz.
Aıta keteıik, sport ınternatta qazirgi kezde 236 bala tárbıelenip jatsa, sonyń jartysynan astamy - aýdandardan kelgender. Jaǵdaıdyń talapqa saı kelmeıtinine qaramastan, bul sport ordasynan áıelder kúresinen Rıo Olımpıadasynyń qola júldegeri Ekaterına Larıonova syndy sańlaqtar túlep ushty.
