Oralda eki turǵynnan 221 keliden astam marıhýana tárkilendi
ASTANA. KAZINFORM – Batys Qazaqstan oblysynda polıtsııa qyzmetkerleri esirtkiniń zańsyz aınalymyna qatysty eki derekti anyqtap, 221 keliden astam marıhýana tárkiledi, dep habarlady Polisia.kz.
Jedel-izdestirý is-sharalary «Qarasora» jedel-profılaktıkalyq is-sharasy aıasynda Oral qalasynda júrgizilgen.
Birinshi jaǵdaıda polıtseıler 34 jastaǵy qala turǵynyn ustady. Onyń úıiniń aýlasynan eki úlken qorap tabylyp, ishinen ósimdik tektes zat salynǵan 12 polıetılen qap tárkilendi.
Saraptama qorytyndysy boıynsha, tárkilengen zat keptirilgen marıhýana bolyp shyqty. Onyń jalpy salmaǵy 198 keli 16 gramdy qurady.
Ekinshi derek boıynsha, 45 jastaǵy Oral turǵynynyń páterin tintý kezinde 23 keli keptirilgen marıhýana tabyldy.
– Osylaısha, eki derek boıynsha zańsyz aınalymnan jalpy salmaǵy 221 keliden astam marıhýana tárkilendi. Atalǵan faktiler boıynsha sotqa deıingi tergep-tekserý bastaldy. Qazirgi ýaqytta esirtkiniń shyǵý tegi men jetkizilý arnalary anyqtalyp jatyr. Óńirde esirtkiniń zańsyz aınalymyna qarsy kúres jalǵasýda, – delingen polıtsııa aqparatynda.
Aıta keteıik, buǵan deıin Aqtóbede polıtsııa úsh er adamdy ustap, olardyń biriniń úıiniń shatyrynan eki bóshkege jasyrylǵan 25 keliden astam marıhýana tárkilegen bolatyn.