Oralda eki stýdent áıeldi órt ishinen aman alyp shyqty
ORAL. KAZINFORM – Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń stýdentteri Esjan Súleımanov pen Nurıslam Táńirbergen BQO TJ departamentiniń alǵyshatymen marapattaldy.
Atalmysh ýnıversıtetten túsken málimetke qaraǵanda, eki stýdent sonymen qatar QR Qorǵanys mınıstrligine marapatqa usynyldy.
Oqıǵa Jáńgir han kóshesi boıynda 59-úıde bolǵan. Keshki saǵat 22.00-ge taman páterlerdiń birinen órt shyqty. Osy kópqabatty úıde turatyn Esjan Súleımanov pen Nurıslam Táńirbergen ashyq terezeden kórshi páterlerdiń birinen qoıý tútin shyǵyp jatqanyn kóredi. Olar dereý kómekke umtylyp, jınalyp qalǵan turǵyndarǵa jedel járdem, órt sóndirý jáne polıtsııa qyzmetin shaqyrýdy ótinedi. Sonymen birge órt shyqqan úıde basqa da kórshileriniń esigin qaǵyp, tezirek dalaǵa shyǵý qajettigin eskertedi.
Bulardyń janyna 26-28 jas shamasyndaǵy Dáýren esimdi jigit qosylady. Sóıtip besinshi qabattaǵy órt shyqqan páterge janushyra kirgen jigitter qoıý qara tútinge tap bolyp, kerme tóbeniń opyrylyp túskenin baıqaıdy. Órttiń qaı jerden shyqqanyn baǵdarlap úlgergen Esjan elektr symdary tuıyqtalyp qalǵan shyǵar degen kúdikpen Nurıslamǵa páterdiń elektr jaryǵyn aıyrýdy ótinedi. Kózge eshteńe kórinbeıtin qatty tútinniń arasyna kirý múmkin bolmady. Soǵan qaramastan, aýyz-muryndaryn japqan kúıi bólmelerdi qaraýǵa kirisedi. Áıel adamnyń daýsy shyqqan bólmege bet alǵan Nurıslam men Dáýren 55-60 jas shamasyndaǵy azamatshany taýyp alyp, syrtqa alyp shyǵady. Áıel esin joǵaltpaǵanmen, eseńgiregen kúıde boldy. Osy kezde oqıǵa ornyna órt sóndirýshiler, polıtsııa qyzmetkerleri men jedel járdem mamandary da jetti.
Bir qýantarlyǵy, ýaqytynda kórsetilgen kómek pen stýdent-jastardyń batyldyǵynyń nátıjesinde eshkim zardap shekpedi.
Esjan ýnıversıtettegi veterınarııa jáne agrotehnologııa ınstıtýtynyń tórtinshi. Nurıslam polıtehnıkalyq ınstıtýttyń úshinshi kýrsynda oqıdy. Ekeýi de qosymsha áskerı kafedrada bilim-biligin jetildirip, shyńdalǵan.
Eske sala keteıik, budan buryn Toqtar Áýbákirovtiń sýǵa batyp bara jatqan balany qutqaryp qalǵanyn jazǵan edik.