Oralda eki kólik soqtyǵysyp, 5 adam aýrýhanaǵa tústi

ORAL. KAZINFORM – Oral qalasynda jeńil kólik pen jedel járdem kóliginiń soqtyǵysýy saldarynan 5 adam aýrýhanaǵa jetkizildi.

Kazinform budan buryn jazǵanyndaı, jeńil kólik pen jedel járdem kóliginiń qatysýymen bolǵan jol apatynan bir adam kóz jumǵan edi.

BQO densaýlyq saqtaý basqarmasy baspasóz qyzmetiniń naqtylaýynsha, barlyǵy 6 adam zardap shekse, sonyń úsheýi – jedel medıtsınalyq járdem qyzmetkerleri.

«VAZ-21099» jeńil kóliginiń júrgizýshisi, 1985 jylǵy er adam alǵan jaraqattary saldarynan statsıonarǵa bara jatqan jolda qaıtys boldy. 50 jastaǵy er adam men 26 jastaǵy jigit, 40 jastaǵy áıel men 27 jastaǵy qyz qalalyq kópbeıindi aýrýhanaǵa jetkizildi. 40 jastaǵy áıel jaraqat bólimshesine jatqyzylyp, em alýda, jaǵdaıy ortasha aýyr. Qalǵan úsheýi qaralyp, tekserilip, qajetti medıtsınalyq kómek kórsetildi. Olarǵa ambýlatorııalyq em taǵaıyndaldy. 12 jasar qyz bala oblystyq kópbeıindi balalar aýrýhanasynda tekserýden ótkennen keıin ambýlatorııalyq em alýǵa jiberildi», dep habarlady vedomstvodan.