Oralda eki avtokólik soqtyǵysyp, áıel adam kóz jumdy
ORAL. KAZINFORM — Oral qalasynda jol apatynan áıel adam qaza tapty. Taǵy eki adam jaraqat aldy.
BQO polıtsııa departamentiniń baspasóz qyzmetinen málim etkenindeı, Zachagan kentinde eki avtokóliktiń qatysýymen jol-kólik oqıǵasy boldy.
Aldyn ala málimet boıynsha Chevrolet Aveo avtokóliginiń júrgizýshisi Zachagan kentinde Jáńgir han kóshesimen kele jatyp, «Jáńgir han» saýda úıi tusynda solǵa qaraı burylý kezinde Lada kóligine jol bermegen. Saldarynan avtokólikter soqtyǵysyp, Chevrolet Aveo avtokóliginde otyrǵan áıel jaraqat alyp, keıin aýrýhanada kóz jumǵan. Atalǵan avtokóliktiń taǵy eki jolaýshysy túrli jaraqatpen aýrýhanaǵa jetkizildi.
— Jol-kólik oqıǵasy boıynsha sotqa deıingi tergeý amaldary júrgizilýde. Qazirgi kezde oqıǵanyń barlyq mán-jaıy anyqtalý ústinde, — dep habarlady vedomstvodan.
Instagram áleýmettik jelisinde jarııalanǵan málimetke qaraǵanda, oqıǵa 13 tamyz kúni shamamen saǵat 23.50-de bolǵan. Jol apaty saldarynan júkti kelinshek qaıtys bolǵan.
Qazirgi kezde oqıǵa kýágerleri, sondaı-aq fotoǵa túsirgen nemese beınejazbaǵa jazyp alǵan adamdar izdestirilip jatyr.
Eske sala keteıik, budan buryn BQO-da 14 jastaǵy qyzdyń júkti bolýyna baılanysty tergeý júrgizilip jatqanyn jazǵan edik.
