Oralda dzıýdodan jasóspirimder arasynda Qazaqstan chempıonaty bastaldy
ORAL. KAZINFORM — Oral qalasynda «Jaıyq Arenada» dzıýdodan jasóspirimder arasynda Qazaqstan chempıonaty bastaldy.
Qazaqstan dzıýdo federatsııasynyń atqarýshy dırektory Aıbek Imashevtiń aıtýynsha, jańadan ashylǵan sport saraıynda osyndaı deńgeıde alǵash ret ótip otyrǵan jarysqa elimizdiń 17 oblysy men úsh qaladan 836 jas dzıýdoshy qatysyp jatyr.
Bul — rekordtyq kórsetkish. Osyǵan deıin jasóspirimder arasynda Qazaqstan chempıonatynda eń kóbi 2023 jyly 818, ótken jyly 813 sportshy baq synaǵan edi.
— Munyń syry mynada — osyǵan deıingi chempıonattarda aldyńǵy oryn alǵan oblystar ár salmaq boıynsha tórt sportshydan qoıyp jatyr. Tórt kúnge sozylatyn dodada úzdikter anyqtalatyn bolady. Ulttyq qurama bapkerleri osynda. Jarys qorytyndysyna sáıkes álem jáne Eýropa kýbogy, álem, Azııa chempıonattarynda el namysyn qorǵaıtyn dzıýdoshylar anyqtalady. Ótken jyly Parıj Olımpıadasynda Eldos Smetovtiń altyn alyp, tarıhı jeńiske qol jetkizgeni belgili. Sonyń nátıjesinde dzıýdoǵa bet burǵan jastardyń qatary kóbeıe tústi, - dedi Kazinform tilshisine A.Imashev.
Eske sala keteıik, budan buryn dzıýdodan Qazaqstan jasóspirimder quramasynyń Eýropa kýbogynda ozyq shyqqanyn jazǵan bolatynbyz.