Oralda «Dúrbi» atty jańa aımaqtyq gazet jaryq kórdi
ORAL. QazAqparat - Oral qalasynda «Dúrbi» atty aımaqtyq qoǵamdyq-tanymdyq táýelsiz gazettiń alǵashqy sany jaryq kórdi, dep habarlaıdy QazAqparat tilshisi.
Batys Qazaqstan, Aqtóbe, Atyraý jáne Mańǵystaý oblystaryna taraıtyn basylymnyń menshik ıesi - «Arýana-Jaıyq» qoǵamdyq qorynyń dırektory, gazettiń bas redaktory, «Aqparat salasynyń úzdigi» Uldaı Sarıevanyń aıtýynsha, mundaǵy basty maqsat - din máselelerin jan-jaqty kóterý. Sonymen qatar áleýmettik túıtkilder, tarıh, ulttyq qundylyq, urpaq tárbıesi, salt-dástúr, til men dil, tylsym, jaratylys, ádebıet jáne basqa taqyryptarda synı jáne taldaý maqalalarǵa deıin basylady. Oǵan qosa «Arýana-Jaıyq» qoǵamdyq qory túrli muqtaj jandar men jetimderge qolushyn sozý, destrýktıvtik dinı aǵymdardan zardap shekkenderge keńes berip, rýhanı jáne materıaldyq jaǵynan qoldaý kórsetý, qyz-kelinshekter úshin jumys kózin ashý jáne basqa baǵyttarda jumys jasamaq. Aptalyq gazettiń birinshi nómiri segiz bolyp shyqqanymen, budan keıin 16 bet bolyp basylmaq.
Gazettiń alǵashqy sany jaryq kórýine baılanysty bolǵan basqosýda BQO ishki saıasat basqarmasynyń basshysy mindetin atqarýshy Darhan Qadyralıev aldaǵy ýaqytta basylymǵa zań aıasynda qoldaý kórsetiletinin jetkizdi. BQO din isteri basqarmasynyń basshysy Talǵat Nyǵmetov, din máselelerin zertteý ortalyǵynyń basshysy Jaras Ahanov Uldaı Sarıevanyń budan buryn da din taqyrybyn batyl qozǵap, qalamy ábden tóselgenin aıtyp, ortaq jumysqa tabys tiledi. BQO mádenıet, muraǵattar jáne qujattama basqarmasynyń basshysy Dáýletkereı Qusaıynovtyń atap ótkenindeı, gazettiń aty taýyp qoıylǵan. ıAǵnı qoǵam men ómirdegi qaltarysy kóp máselelerdi dúrbimen qaraǵandaı, anyq-qanyǵyna kóz jetkizip, oqyrman kóńili senetindeı etip tereń qozǵaı bilse, maqsattyń oryndalǵany.
Jıynda sondaı-aq QMDB BQO boıynsha ókil ımamy Rýslan Sultanov, «Nur Otan» partııasy BQO fılıaly tóraǵasynyń orynbasary Gúlnáz Quljanova, oblystyq ortalyq meshittegi aqsaqaldar alqasynyń tóraǵasy Nádir Abdýkaev jáne basqalar usynys-pikirlerimen bólisip, qoldaıtyndyqtaryn bildirdi. 
