Oralda dúkenge qaraqshylyq shabýyl jasaǵan kúdikti qolǵa tústi
ORAL. QazAqparat - Oralda "Mobılnık" dúkenine qaraqshylyq shabýyl jasaǵan kúdikti qolǵa tústi, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, oqıǵa keshe shamamen saǵat 16.50-de oryn aldy.
Qylmysker dúken ıesi kásipkerge pyshaq jumsap, uıaly telefondardy alyp, oqıǵa ornynan boı tasalaǵan. Qazir jaraqat alǵan kásipker aýrýhanada jatyr.
Oqıǵa kýágerleriniń sózine qaraǵanda, qolqasyna pyshaq tıgen kásipker kóp qan joǵaltqan. Abyroı bolǵanda, dárigerler tórt saǵattaı ota jasap, jigittiń ómirin saqtap qaldy.
Jedel izdestirý sharalary barysynda qylmystyń izi sýymaı ashyldy. Abaı polıtsııa bóliminiń qyzmetkerleri osy qylmysqa kúdikti retinde Báıterek aýdanynyń buryn sottalǵan 1979 jylǵy turǵynyn ustady.
Kúdikti QR Qylmystyq is júrgizý kodeksi 128-baby tártibimen Oral qalasy polıtsııa basqarmasynyń ýaqytsha oqshaýlaý ızolıatoryna qamaldy.
Qazirgi kezde QR QK 192-baby 1-bóligine sáıkes (qaraqshylyq) sotqa deıingi tergeý amaldary júrgizilýde.
Aıta keteıik, qaraqshylyq shabýyl jasaǵannyń bir adam ekendigi beınebaqylaý kamerasynan da anyq kórinedi.
