Oralda dúken men aqsha aıyrbastaý pýnktin tonaǵandar ustaldy

Oral qalasy polıtsııa basqarmasy bastyǵynyń orynbasary Nurlan Bısenovtiń málim etkenindeı, uıymdasqan qylmystyq toptyń eki múshesi aqtóbelik bolsa, bireýi – oraldyq turǵyn.

Qazirgi tańda kúdiktilerge qatysty QR QK 192-baby 2-bóligine (qaraqshylyq), 188-baby 3-bóligi (urlyq) jáne 191-baby 2-bóligine (kisi tonaý) sáıkes qylmystyq is qozǵalyp, birqatar saraptama taǵaıyndaldy. Olardyń basqa da qylmystarǵa qatystylyǵy tekserilýde.

N.Bısenovtiń sózine qaraǵanda, bıylǵy 21 aqpanda qara betperde kıgen belgisiz bireýler Derkól aýylyndaǵy «Tranzıt» dúkenine qaraqshylyq shabýyl jasaǵan bolatyn. Satýshyny tapanshaǵa uqsas zatpen qorqytyp, kassadan 75 myń teńgeni alyp ketken. Onymen tynbaı, osy ǵımaratta ornalasqan aqsha aıyrbastaý pýnktine kirip, 1,5 mln teńge men noýtbýkti jymqyryp, boı tasalaǵan.

-Qylmystyq top óz áreketin aldyn ala josparlap, aqsha aıyrbastaý pýnktiniń kassırin jumysqa bara jatqanda, urlap áketken. Sonyń kiltimen aqsha aıyrbastaý pýnkti men seıfti ashqan. Kassır men satýshyny baılap tastap, mashınada ustaǵan. Polıtsııa departamenti bastyǵynyń buıryǵymen arnaıy jedel tergeý toby quryldy. Jedel izdestirý jumystary barysynda Aqtóbeden eki kúdikti ustalyp, Oralǵa jetkizildi. Bireýi Oraldan qolǵa tústi. Olar 1979, 1981 jáne 1984 jylǵylar bolyp shyqty, - deıdi N.Bısenov.

Kúdiktilerdiń biri buǵan deıin adam ólimine aparyp soqqan aýyr dene jaraqattaryn salǵany úshin qylmystyq jaýapkershilikke tartylǵan.

Tergeý barysynda zattaı aıǵaqtar tárkilendi. Qaraqshylyq shabýyl kezinde olardyń tapansha mýlıajyn paıdalanǵany anyqtaldy. Al qarjyny óz qajetterine jumsap úlgergen.

Eske sala keteıik, budan buryn Oralda Taraz turǵyny 21 kg esirtkimen ustalǵanyn jazǵan bolatynbyz.