Oralda dopty hokkeıden respýblıkalyq jarystyń jeńimpazdary anyqtaldy
ORAL. QazAqparat - Oralda QR ІІІ qysqy jastar oıyndary aıasynda dopty hokkeıden respýblıkalyq jarys márege jetti, dep habarlaıdy QazAqparat tilshisi.
Atalmysh týrnırge Aqtóbe, Batys Qazaqstan, Shyǵys Qazaqstan, Aqmola, Soltústik Qazaqstan, Almaty oblystary men Astana, Almaty qalalarynan segiz komanda qatysyp, baq synady.
Jarys qorytyndysynda BQO quramasy jeńimpaz atandy. Aqtóbelikter ekinshi, shyǵysqazaqstandyqtar úshinshi orynǵa ıe boldy.
«Aqjaıyq» sport klýby dırektorynyń mindetin atqarýshy Armat Meńdeshevtiń aıtýynsha, bul týrnırdiń bir ereksheligi, onyń qorytyndysyna sáıkes Krasnoıarsk qalasynda aldaǵy aıda ótetin XXIX dúnıejúzilik qysqy ýnıversıadaǵa baratyn oıynshylar irikteledi.
Qazaqstan quramasyn ýnıversıadaǵa Reseıdiń joǵary lıgasynda óner kórsetetin «Aqjaıyqtyń» bas bapkeri, oraldyq maman Nıkolaı Shavaldın bastap barady. Quramaǵa «Aqjaıyqtan» Berjan Ahmetjanov (qaqpashy), Nurbol Bókeshov, Dáýren Oralov, Ershat Amangeldıev, Andreı Gýşın, Maksım Ótebalıev, Bolat Muhıt jáne Ilıa Glýhov alyndy.
Bulardyń ishinde Qazaqstan jasóspirimder quramasynyń músheleri N.Bókeshov pen D.Oralovtan basqalary qańtar aıynda eresekter arasynda Shvetsııada ótken álem chempıonatyna qatysyp, tájirıbe jınaqtap keldi. Onda Qazaqstan quramasynyń tórtinshi orynǵa ıe bolǵany málim.
«21 aqpan kúni «Aqjaıyq» Reseı chempıonatyndaǵy sońǵy oıynyn ótkizgennen keıin el quramasynyń músheleri Astanaǵa attanady. Sodan keıin Krasnoıarskige bet alady. Ýnıversıadada dopty hokkeıden alǵashqy eki oryndy Reseı men Shvetsııa bere qoımas. Al qola júlde úshin fındermen talasýǵa bolady», dedi QazAqparat tilshisine A.Meńdeshev.
Eske sala keteıik, budan buryn «Aqjaıyq» «Maıak komandasyn» eki márte utqan bolatyn.
