Oralda dopty hokkeıden respýblıkalyq deńgeıde jarys ótýde
ORAL. QazAqparat - Oralda dopty hokkeıden QR ІV qysqy spartakıadasynyń oıyndary bastaldy, dep habarlaıdy «QazAqparat» tilshisi.
Oǵan Astana, Almaty, Aqtóbe, Óskemen, Petropavl, Kókshetaý, Oral qalalary men Almaty oblysynan barlyǵy segiz komanda qatysyp, baq synaýda.
Jarystyń ashylý rásiminde oblys ákiminiń orynbasary Ǵabıdolla Ospanqulov sportshylardy Táýelsizdik kúnimen quttyqtap, tabys tiledi. Onyń aıtýynsha, dopty hokkeıden qysqy spartakıada oıyndarynyń Oralda ótýi tegin emes. Óıtkeni Oralda dopty hokkeı áýelden jaqsy damyǵan. 1976 jyly otaý tikken dopty hokkeı komandasy (qazir «Aqjaıyq») áli de sheberler sanatynda óner kórsetip keledi.
Dopty hokkeıden QR memlekettik jattyqtyrýshysy Oralbaı Jaqsymbetovtiń sózine qaraǵanda, kóp uzamaı Oraldaǵy «Jastar» stadıonynda jasandy muz aıdyny paıdalanýǵa beriledi. Bul dopty hokkeıdiń burynǵydan da qarqyndy damýyna septigin tıgizeri sózsiz.
Qysqy spartakıada oıyndary 21 jeltoqsan kúni márege jetip, myqtylar anyqtalady.
Eske sala keteıik, dopty hokkeıden «Aqjaıyq» klýby joǵary lıga komandary arasynda búkilreseılik jarysta jylma-jyl oınap keledi. Ol - Qazaqstanda osy oıyn túrinen saqtalyp qalǵan jalǵyz komanda. Sebebi kezinde eki márte KSRO chempıony jáne Eýropa chempıondary kýbogynyń ıegeri atanǵan «Dınamo» (Almaty) komandasy 1995 jyly tarap ketken bolatyn.
