Oralda dırıjer, kompozıtor Erkin Nurymbetovtiń shyǵarmashylyq keshi ótti
ORAL. QazAqparat - Oral qalasyndaǵy Qadyr Myrza Áli atyndaǵy mádenıet jáne óner ortalyǵynda Dáýletkereı atyndaǵy halyq aspaptar orkestriniń kórkemdik jetekshisi jáne bas dırıjery, QR Kompozıtorlar odaǵynyń múshesi, «Daryn» memlekettik jastar syılyǵy men «Qurmet» ordeniniń ıegeri, mádenıet salasynyń úzdigi Erkin Nurymbetovtiń shyǵarmashylyq keshi ótti.
Sondaı-aq kesh barysynda kompozıtordyń «Aqjaıyq sazdary» atty jańa kitabynyń tanystyrylymy boldy, dep habarlaıdy «QazAqparat» HAA tilshisi.
Sharada oblystyq mádenıet, muraǵattar jáne qujattama basqarmasynyń basshysy Dáýletkereı Qusaıynovtiń atap ótkenindeı, Erkin Shaıahmetuly - mýzyka salasynyń bilgir mamany, týyndylary elge keńinen taralǵan kompozıtor, kásibı dırıjer. Ol - otyzdan astam ánderdiń, dombyra, qobyz, sazsyrnaı syndy aspaptarǵa arnalǵan shyǵarmalardyń avtory. 2001 jyldan Ǵ.Qurmanǵalıev atyndaǵy oblystyq fılarmonııada qyzmet etip kele jatqan Erkin Nurymbetovtiń Dáýletkereı atyndaǵy orkestrdiń kásibı jaǵynan shyńdalýyna qosqan úlesi mol. Halyq jáne Qazaqstan kompozıtorlarynyń tańdaýly týyndylaryn nasıhattap, elge tanylýyna da erekshe eńbek sińirip keledi. Sonyń bir dáleli - «Aqjaıyq sazdary» atty kitaby. Munda araıly Aq Jaıyq, ásem Oral týraly ánder partıtýralarymen qosa berilgen. Aldaǵy ýaqytta bul jınaqtyń ekinshi tomy da qurastyrylmaqshy.
Shyǵarmashylyq keshte ánshi-termeshi, QR eńbek sińirgen qaıratkeri Qatımolla Berdiǵalıev, kúıshi, Qazaqstannyń eńbek sińirgen mádenıet qyzmetkeri, «Qurmet» ordeniniń ıegeri Ermek Qazıev, Dáýletkereı atyndaǵy orkestrdiń dombyrashylary, kompozıtordyń zaıyby, qobyzshy, mádenıet qaıratkeri Jámıla Nurymbetova óz ónerlerin kórsetti. Sharaǵa Erkin Nurymbetovtiń Syr boıynan arnaıy kelgen ata-anasy Shaıahmet pen Sársenkúl de qatysyp, talantty ulynyń mereıli sátterine kýá boldy.
