Oralda Depo kópiri jóndeýden keıin qaıta ashyldy
ORAL. KAZINFORM – Oral qalasynda G.Belger kóshesin Ábilqaıyr han dańǵylymen jalǵaıtyn Depo kópirindegi jóndeý jumystary tolyq aıaqtaldy.
Oral qalasy ákimdiginen málim etkenindeı, jóndeý aıasynda kópir ústindegi 11 deformatsııalyq jik qalpyna keltirildi.
Jóndeýmen qamtylǵan ýchaskeniń uzyndyǵy – 536 metr. Jumystardy merdiger «Nurtem» JShS júrgizdi.
- 26 maýsymda bastalǵan jóndeý jumystary eki aptaǵa josparlanǵan bolatyn. Degenmen merdiger kompanııa belgilengen merzimnen buryn aıaqtaý úshin barlyq qajetti resýrsty jumyldyryp, jumysty merziminen buryn aıaqtady. Kópir jabynyna jol tańbalary syzylyp, tolyqtaı jýylyp, turǵyndar ıgiligine qaıta usynyldy, - dep habarlady vedomstvodan.
Jóndeý kezinde kópir jabylǵandyqtan, qalada qatynas qıyndap, kólik keptelisi boldy.
Eske sala keteıik, budan buryn Oral qalasyndaǵy Depo kópiri 15 kúnge jóndeýge jabylatynyn jazǵan edik.