Oralda «Densaýlyq» klýbynyń 25 jyldyǵyna arnalǵan voleıbol týrnıri márege jetti

Jarysqa qatysqan oblystyq máslıhat hatshysy, «Densaýlyq» klýbynyń múshesi Málik Qulshardyń aıtýynsha, atalmysh klýb 1991 jyly jazda quryldy. Onyń alǵashqy   jetekshisi oblystyq voleıbol federatsııasynyń prezıdenti Valerıı Kondratenko (qazir marqum) edi. Elbasynyń sporttyń buqaralylyǵyn arttyrý jónindegi tapsyrmasyna sáıkes salamatty ómir saltyn ornyqtyrý, ardager oıynshylardyń basyn qosyp, denesin shynyqtyrý maqsatynda qurylǵan klýb quramynda qazirge deıin 100-den astam adam jattyqty. Klýbtyń kúni búgin oblystyń alty aýdanynda fılıaldary qurylyp, jumys jasaýda.

«Densaýlyq» klýbynyń 25 jyldyq mereıtoıyna arnaıy kelgen, kezinde onyń quramynda jattyqqan, qazir Saratov qalasynda turatyn eńbek ardageri Alekseı Dergýnov qazaqstandyqtarǵa el táýelsizdiginiń 25 jyldyǵyna oraı rııasyz tilegin jetkizdi.

Mereıtoılyq týrnırge Oral qalasy men oblys aýdandarynan barlyǵy jeti komanda qatysyp, baq synady. Jarys qorytyndysynda «Densaýlyq» klýby jeńimpaz atansa, Terekti, Aqjaıyq aýdandarynyń komandalary ekinshi, úshinshi oryndardy bólisti. Tórtinshi orynǵa taban tiregen Qaztalov voleıbolshylary da júldesiz qalǵan joq. Olarǵa kýbok, dıplomdar, medaldar men syılyqtar tabys etildi. Sonymen qatar Sergeı Zagnoı (Terekti) «úzdik shabýylshy», Murat Meńdiǵalıev (Aqjaıyq) «úzdik qorǵaýshy», Muzapar Tańatov (Bókeı ordasy) «úzdik baılanystyrýshy», Eraly Qusaıynov (Qaztalov) «úzdik oıynshy», Serik Esenov («Densaýlyq») «týrnır aqsaqaly» atanyp, aqshalaı syılyqtarmen marapattaldy.