Oralda denesiniń kóp bóligin kúıik shalǵan 8 jasar bala kóz jumdy

ORAL. KAZINFORM — Oral qalasynda 8 jasar balanyń kúıik jaraqatyn alǵany jóninde Instagram áleýmettik jelisinde aqparat jarııalandy.

Turǵyndardyń sózine qaraǵanda, jazataıym oqıǵa 10 tamyz kúni shamamen saǵat 16.30-da Qonaev shaǵynaýdany 55-úı mańynda bolǵan.

Aldyn ala málimet boıynsha jergilikti turǵyn úı aýlasynda avtomobılin jóndep jatyp, janar-jaǵarmaı quıylǵan kanıstrdi qaldyryp ketken. 

Aýlada oınap júrgen balalar qaýipti sezinbesten ot qoıǵan. Saldarynan kanıstr jarylyp, bir balanyń kıimin sharpyǵan.

Denesin túgelge jýyq kúıik shalǵan bala óte aýyr jaǵdaıda jansaqtaý bólimine túsip, jasandy tynys alý apparatyna qosylǵan. 

— Qylmys quramynyń joqtyǵyna baılanysty bir-eki bala men júrgizýshiniń sózi negizinde polıtsııa isti japqan. Áıtse de tanystar kýágerler bolǵanyn aıtady. Sondyqtan oqıǵanyń mán-jaıyn tolyq anyqtaý úshin qandaı da bolsyn aqparat biletinderdiń habarlasqanyn ótinemin. Júrgizýshiler óz avtokólikterine muqııat bolyp, tez janatyn jáne jarylys qaýpi joǵary zattardy qaldyrmaýy kerek. Sondaı-aq polıtsııa qyzmetkerleriniń júk salǵyshta benzıni bar kanıstrdi qaldyryp ketken júrgizýshini jaýapqa tartpaǵanyn da atap ótkim keledi, — dep jazdy turǵyn áleýmettik jelide.

BQO densaýlyq saqtaý basqarmasynyń baspasóz qyzmeti balanyń 17 tamyz kúni qaıtys bolǵanyn habarlady. Barlyq qoldanylǵan sharalarǵa qaramastan, denesin 95 paıyz kúıik shalǵan balany aman alyp qalý múmkin bolmady. 

BQO polıtsııa departamentiniń baspasóz qyzmeti aqparatty keıin beretinin jetkizdi.

Eske sala keteıik, budan buryn Oralda eki qyzdyń 16 kelige jýyq esirtkimen ustalǵanyn jazǵan edik.