Oralda dástúrli «Jaıyq tolqyny» ólketaný festıvali márege jetti
ORAL. QazAqparat - Oral qalasynda «Máńgilik el» patrıottyq aktisi men «Meniń Otanym - Qazaqstan» respýblıkalyq týrıstik-ólketaný ekspedıtsııasy aıasynda dástúrli «Jaıyq tolqyny» ólketaný festıvali márege jetti, dep habarlaıdy «QazAqparat» HAA tilshisi.
BQO balalar-jasóspirimder týrızmi jáne ekologııa ortalyǵy uıymdastyrǵan baıqaýǵa oblys aýdandary men Oral qalasynan 7-9 synyp oqýshylarynan quralǵan 13 komanda (ár topta 7 adamnan) qatysyp, baq synady.
Atalmysh ortalyq dırektory, pedagogıka ǵylymdarynyń kandıdaty Vıktor Fomınniń aıtýynsha, jetkinshek urpaqty otanshyldyq rýhta tárbıeleý, óz ólkesin tereńirek tanyp-bilý maqsatynda atalmysh festıval 1989 jyldan beri ótkizilip keledi.
Bıylǵy bir erekshelik, «Jas qalamger» atalymyna qatysýshylar Batys Qazaqstan oblystyq «Oral óńiri» jáne «Prıýrale» gazetteriniń 100 jyldyǵyna baılanysty qos basylym týraly esse, shyǵarmalar jazdy. Sondaı-aq jas sýretshiler óz týyndylaryn batysqazaqstandyq belgili sýretshi Sáken Ǵumarovtyń seksen jyldyǵyna arnady.
Festıval qorytyndysynda «Jas qalamger» atalymy boıynsha Qaratóbe aýdanynan kelgen N.Hamıtova, «Jas sýretshiden» jańaqalalyq M.Joldyǵalıeva, «Jas sheberden» aqjaıyqtyq D.Qashqynbaeva, «Jas dızaınerden» qaztalovtyq A.Esengeldına, «Jas aspazdan» aqjaıyqtyq A.Mustafına bas júldeni ıelendi. «Jas talanttar» atalymynan Qaztalov aýdany oqýshylary jeńimpaz atansa, Oral qalasy birinshi, Syrym aýdany ekinshi, bókeıordalyqtar úshinshi oryndy enshiledi.
