Oralda dárigerler terezeden qulaǵan eki balanyń jaǵdaıy jóninde aıtyp berdi
ORAL. KAZINFORM — Oral qalasynda kópqabatty úıdiń terezesinen qulap ketken eki balanyń naqty jaǵdaıy belgili boldy.
BQO densaýlyq saqtaý basqarmasynyń baspasóz qyzmetinen málim etkenindeı, 5 jasar bala bıylǵy 28 naýryz ben 13 sáýirdiń aralyǵynda oblystyq kópbeıindi balalar aýrýhanasynyń travmatologııa bóliminde statsıonarlyq em qabyldady.
Qazirgi ýaqytta nevrologııa bóliminde emin jalǵastyryp jatyr. Jaǵdaıy ortasha aýyr, dınamıkada nasharlaý baıqalmaıdy. Dárigerlerdiń baqylaýynda.
— Sonymen qatar 6 jasar bala da oblystyq kópbeıindi balalar aýrýhanasynda em qabyldaǵan. Ol ekinshi qabattan qulap, jaraqat alǵan. Naýqasqa qajetti medıtsınalyq kómek kórsetilip, sonyń ishinde hırýrgııalyq em júrgizildi. Qazirgi ýaqytta jaǵdaıy turaqtanǵan, — dep habarlady vedomstvodan.
Eske sala keteıik, budan buryn Oralda terezeden qulaǵan eki balanyń bireýi aýyr jaǵdaıda jatqanyn jazǵan bolatynbyz.
