Oralda bıýdjetten 11,4 mln teńge jymqyrǵan ákimdik qyzmetkeri sottaldy

ORAL. QazAqparat – Oralda bıýdjet qarjysyn jymqyrǵan qalaǵa qarasty Jelaev aýyldyq okrýgi ákimi apparaty qarjy-ekonomıka bóliminiń basshysy G.Habýlova sottaldy, dep habarlaıdy QazAqparat tilshisi.

BQO boıynsha ekonomıkalyq tergeý departamentinen túsken málimetke qaraǵanda, G.Habýlova 2013-2019 jyldary býhgalterlik qujatqa atalǵan memlekettik mekemeniń sharýashylyq jáne qarjylyq qyzmeti týraly kórineý jalǵan málimetter engizgen.

Atap aıtqanda, «Kaznacheıstvo klıent» aqparattyq júıesinde óziniń elektrondy qoltańbasyn paıdalana otyryp, kartochkalyq shotyna eńbek demalysy jáne emdik járdemaqy túrindegi qarajatty negizsiz aýdarǵan. Sóıtip ol memleketke 11 mln 473,149 myń teńge zalal keltirgen.

Zalal tolyqtaı óndirildi.

G.Habýlova Oral qalalyq sotynyń úkimimen QR QK 189-baby 4-bóligi 2-tarmaǵyna (senip tapsyrylǵan bóten múlikti ıemdený nemese talan-tarajǵa salý) sáıkes aıypty dep tanylyp, múlkin tárkileýsiz eki jylǵa bas bostandyǵynan aıyryldy.