Oralda burynǵy polıtsııa qyzmetkeri úshinshi qabattan sekirip ketti
ORAL. QazAqparat - Oralda burynǵy polıtsııa qyzmetkeri jaýap alý kezinde úshinshi qabattan sekirip ketti, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, 16 aqpan kúni shamamen saǵat 11.15-te Oral qalasynyń turǵyny, 1975 jylǵy Álibek Erǵazıev qalalyq polıtsııa basqarmasyna jetkizilgen.
Ol 13 aqpan kúni Oral qalasy ákiminiń turǵyndarmen eseptik kezdesýi kezinde ózimen qatar otyrǵandardy ıterip, balaǵat sózder aıtyp, tynyshtyqty buzǵan. Osy buzaqylyq áreketteri úshin Á.Erǵazıev ákimshilik is qozǵaý úshin polıtsııa basqarmasyna ákelingen.
Ákimshilik quqyqbuzýshylyq týraly hattama toltyrý kezinde Á.Erǵazıev jaýapkershilikten qutylyp ketý úshin úshinshi qabattaǵy qyzmettik kabınet terezesin ashyp, kóshege sekirip ketken. Sonyń saldarynan jaraqat alǵan turǵyn jedel járdem kóligimen qalalyq kópbeıindi aýrýhanaǵa jetkizildi.
Osy oqıǵa boıynsha qyzmettik tekserý júrgizilýde.
Usaq buzaqylyq jasaǵany úshin QR Ákimshilik quqyqbuzýshylyq kodeksiniń 434-babyna sáıkes Á.Erǵazıevke qatysty materıal Oral qalasy mamandandyrylǵan ákimshilik sotyna jiberildi. Bul bap boıynsha 5 AEK kóleminde aıyppul salý nemese 10 táýlikke deıin ákimshilik qamaýǵa alý qarastyrylǵan.
«Sonymen qatar basqarmaǵa ákelingen kezde Á.Erǵazıev polıtsııa qyzmetkeriniń zańdy talabyna baǵynbaı, kúsh kórsetken. Bul ákimshilik quqyqbuzýshylyq úshin atalǵan kodekstiń 667-baby 1-bóligine sáıkes hattama toltyryldy», dep habarlady departamenttiń baspasóz qyzmetinen.
Aıta keteıik, Á.Erǵazıev buryn Oral stansasyndaǵy jelilik ishki ister bóliminde jumys jasaǵan. Ol 2017 jyly qyzmettik tártipti óreskel buzyp, QR memlekettik qyzmetshileri Ádep kodeksi talaptaryna qaıshy is-áreketter jasaǵany úshin quqyq qorǵaý organdarynan qýylǵan.
