Oralda burynǵy kelinin óltirgen azamat 11 jylǵa sottaldy
ORAL. QazAqparat - BQO qylmystyq ister jónindegi mamandandyrylǵan aýdanaralyq sotynyń úkimimen burynǵy kelinin óltirgen Asylbek Omarov aıypty dep tanyldy, dep habarlaıdy QazAqparat tilshisi.
Sýdıa Baqyt Ermahanovtyń málim etkenindeı, A.Omarov QR QK 99-baby 1-bóligine sáıkes 11 jylǵa bas bostandyǵynan aıyrý jazasyn qaýipsizdigi joǵary qylmystyq-atqarý júıesi mekemesinde óteýge sottaldy.
Sonymen qatar, sottalýshy qaza tapqan Aqerke Qozykeshevanyń otbasyna moraldyq ótemaqy retinde 5 mln teńge jáne materıaldyq shyǵyn esebinde 1,4 mln teńge tóleýi tıis.
Sot sondaı-aq BQO ishki ister departamenti bastyǵy atyna qyzmetkerleriniń tıisti shara qoldanbaǵany úshin jeke uıǵarym shyǵardy. Óıtkeni, Aqerke qaza tabarynan bir kún buryn, 7 sáýir kúni 102 telefonyna habarlasyp, Omarovtyń kek alamyn dep ómirine qaýip tóndirgenin aıtqan. Áıtse de, budan eshqandaı nátıje shyqpaǵan.
Sot talqysynda belgili bolǵandaı, Semeı qalasynda turǵan 28 jasar Aqerke Qozykesheva óziniń ulyn alyp ketý úshin Oralǵa kelgen. 8 sáýir kúni Aqerke burynǵy kúıeýi Saıat Qozykeshevpen jáne kishkentaı ulymen kezdesý úshin ata-enesiniń úıine kelgen. Ol kezde Aqerkeniń eki jasar uly Oralda, burynǵy kúıeýiniń ata-anasynyń qolynda bolǵan.
Úıdiń aýlasynda Aqerke men Saıat, qaıyn atasy Asylbektiń arasynda janjal týyndaǵan. Budan keıin Aqerke, onyń burynǵy kúıeýi men uly taksıge otyryp, jaldamaly páterge ketken. Sottalýshy Asylbek Omarov jolaı taksı ustap, uly men burynǵy kelini otyrǵan kóliktiń artynan júrgen. Tıisti jerge kelgennen keıin, Omarov birinshi podezge kirip, uly men burynǵy kelini jaldaǵan páterdi izdeı bastaıdy. Ol Aqerke men Saıattyń daýsyn estip, 5-qabattaǵy páterdi tabady. Omarov uly men nemeresiniń ketkenin kútip, kelinimen sóılesý úshin páterdiń esigin qaǵady. Basynda Aqerke burynǵy qaıyn atasyn páterge kirgizgisi kelmegen. Sóılesýge nıet bildirgen Asylbek Omarov pen kelininiń arasynda daý-damaı týyndaǵan. Osy kezde Aqerkeni judyryǵymen betinen uryp jiberedi. Burynǵy kelini qulap qalǵannan keıin Omarov ony uryp, tepkileı bastaǵan. Munan soń janynda jatqan sholaq shalbardyń baýyn alyp, onymen burynǵy kelinin býyndyrǵan. Artynsha asúıden pyshaq alyp, Aqerkeniń keýdesine pyshaq salǵan.
Sot-medıtsınalyq saraptama qorytyndysyna sáıkes, marqum júrek tusynan suǵylǵan pyshaq jaraqatynan kóz jumǵan.
Eske sala keteıik, budan buryn kelinin óltirdi degen kúdikpen qaıyn atasynyń qamalǵanyn, onyń óz qylmysyn moıyndaǵanyn jazǵan bolatynbyz.
