Oralda burynǵy polıtseıdiń pyshaq jaraqatyn alýyna qatysty qylmystyq is qozǵaldy
ORAL. KAZINFORM — Oralda 8 qarasha kúni burynǵy polıtsııa qyzmetkeri pyshaq jaraqatymen medıtsına mekemesine jetkizildi.
BQO polıtsııa departamentiniń baspasóz qyzmetinen málim etkenindeı, atalǵan derek boıynsha qylmystyq is qozǵaldy.
Qazirgi kezde oqıǵanyń barlyq mán-jaıy anyqtalý ústinde.
Jábirlenýshiniń sózine qaraǵanda, ol óziniń abaısyzdyǵy saldarynan jaraqat alǵan.
Sonymen qatar tergeý aıasynda barlyq joramal, sonyń ishinde basqa burynǵy polıtsııa qyzmetkeriniń iske qatysty bolýy múmkindigi tekserilip jatyr.
— Tergeýdiń obektıvtiligin qamtamasyz etý úshin oǵan ózindik qaýipsizdik bólimshesiniń qyzmetkerleri tartyldy. Sondaı-aq qyzmettik tekserý júrgizilýde. Atalǵan eki polıtsııa qyzmetkeri de buryn ishki ister organdarynan qýylǵan. Osy oraıda jekelegen áleýmettik jelilerde taratylyp jatqan janjaldyń birge spırttik ishimdik ishý barysynda shyqqany jónindegi aqparat shyndyqqa sáıkes kelmeıdi. Kórineý jalǵan aqparatty taratqany úshin qylmystyq jaýapkershilik qarastyrylǵanyn eske salamyz. Túpkilikti quqyqtyq baǵa tergeý qorytyndysyna sáıkes beriledi, — dep habarlady vedomstvodan.
Eske salaıyq, budan buryn BQO-da qurylys alańynda kran qulap, er adamnyń mert bolǵanyn jazǵan edik.
