Oralda býllıngke baılanysty mektep dırektory qyzmetinen bosatyldy

Oralda býllıngke baılanysty №38 mektep-lıtseıiniń dırektory Raıhan Bıǵazıeva qyzmetinen bosatyldy, dep habarlaıdy Kazinform Oral qalasy bilim berý bóliminen túsken málimetke silteme jasap. 

Habarlamaǵa qaraǵanda, 7 jeltoqsan kúni Oral qalasy bilim berý basshysynyń mindetin atqarýshy Indıra Ámirtaevanyń qabyldaýynda bolǵan ata-ana mektepte balasyn urǵanyn jáne beınejazbaǵa túsirip, áleýmettik jelige ornalastyrǵanyn málimdegen.

Aryz boıynsha mektep ákimshiligi shaqyrtylyp, májilis ótkizildi. Májilis barysynda mektep dırektory R.Bıǵazıevaǵa ata-anaǵa pedagogıkalyq qoldaý kórsetý, kámeletke tolmaǵan ulyna psıhologııalyq kómek berý tapsyryldy. Sondaı-aq ata-ananyń suraýy boıynsha «Jas urpaq» ortalyǵy, ortalyq psıhologynyń baılanys nómiri berildi. Mektepte ata-analar jınalysy ótkizilgen.

Oqýshylar arasynda quqyq buzýshylyqqa jol bergeni úshin sol kúni synyp jetekshilerine, pán muǵalimi men dırektordyń tárbıe isi jónindegi orynbasaryna jáne mektep basshysyna sógis túrindegi tártiptik jaza berildi.

«12 jeltoqsan kúni oblys ákimdigi janyndaǵy kámeletke tolmaǵandardyń quqyǵyn qorǵaý jónindegi komıssııa otyrysy boldy. Oral qalasy bilim berý bóliminiń 12 jeltoqsandaǵy buıryǵymen mektep dırektory R.Bıǵazıeva QR Eńbek kodeksi 49-babynyń 5-tarmaǵy negizinde jumystan bosatyldy», - delingen habarlamada.

Qazirgi ýaqytta bilim berý uıymdarynda balalardyń arasynda quqyq buzýshylyqtyń, býllıngtiń aldyn alýǵa qatysty jumystar kúsheıtildi.

«Balany jábirleýdiń (býllıngtiń) profılaktıkasy» jospary daıyndalyp, Qazaqstan Respýblıkasy Oqý-aǵartý mınıstriniń 2022 jylǵy 21 jeltoqsandaǵy №506 buıryǵymen birge bilim berý uıymdaryna jyl boıyna jumystaný úshin joldandy. Jospar negizinde is-sharalarmen ata-analar, oqýshylar jáne pedagogtardy qamtý kózdelgen», - dep habarlady vedomstvodan.

Eske sala keteıik, budan buryn mekteptegi býllıngke baılanysty Oralda birneshe pedagog pen ata-analar jaýapqa tartylǵanyn jazǵan bolatynbyz.