Oralda býldozer men avtobýs soqtyǵysyp, úsh adam jaraqat aldy

BQO densaýlyq saqtaý basqarmasynyń baspasóz hatshysy Aınagúl Saqposynovanyń aıtýynsha, oqıǵa búgin tańerteń «Juldyz» shaǵynaýdanynda boldy.

Eýrazııa men Alash kósheleriniń qıylysynda býldozer №33 baǵytpen júretin avtobýspen soqtyǵysqan.

Jedel járdem saǵat 10.19-da shaqyrtyldy.

Oqıǵa saldarynan úsh adam zardap shekti. 2009 jylǵy bala men 1996 jylǵy qyz oblystyq aýrýhanaǵa jetkizildi. Olar tekserilgennen keıin ambýlatorııalyq em alýǵa jiberildi. 1980 jylǵy er adam aýrýhanaǵa barýdan bas tartty.

BQO polıtsııa departamentiniń baspasóz qyzmeti qolaısyz aýa raıyna baılanysty óńirde jol-kólik oqıǵalarynyń jıilep ketkendigin jetkizdi. 13 qańtar kúni kóktaıǵaqtyń saldarynan Oral-Atyraý jolynda 6 júrgizýshi avtokólik (sonyń tórteýi - júk kóligi) rýline ıe bola almaı, joldan túsip ketti. Zardap shekkender joq.

Ótken demalys kúnderi Oral qalasynyń ózinde ıelerine materıaldyq shyǵyn ákelgen jıyrmadan astam jol-kólik oqıǵasy tirkeldi.

BQO TJ departamentinen túsken málimetke qaraǵanda, jolda qalǵan birneshe sheteldik azamatqa da kómek kórsetildi.

14 qańtar kúni saǵat 16.40-ta Oral-Atyraý jolynyń 153-shaqyrymynda Aqjaıyq aýdany Mergen aýyly tusynda joldan túsip ketken Túrkııa azamatyna tıesili «Iveco» júk kóligi avtojoldyń tazartylǵan bóligine shyǵaryldy. Sol kúni saǵat 17.22-de Samara-Shymkent jolynyń 350-shaqyrymynda Syrym aýdanynda qyrǵyzstandyq azamatqa tıesili DAF júk kóligi de shyǵaryldy. Saǵat 22.45-te Oral-Atyraý jolynyń 288-shaqyrymynda Aqjaıyq aýdany Atameken men Aqsýat aýyldarynyń arasynda DAF kóligimen turyp qalǵan ózbekstandyq azamatqa da járdem berildi.

Eske sala keteıik, budan buryn oblysta jol apatynan bir adamnyń qaza tapqanyn jazǵan bolatynbyz.