Oralda bos jumys oryndarynyń keńeıtilgen jármeńkesi ótkizildi
Bos jumys oryndary jármeńkesiniń ashylý sharasynda sóz alǵan Oral qalasy ákiminiń orynbasary Mars Satybaldıevtiń aıtýynsha, Oral qalasy boıynsha turǵyndardy jumysqa ornalastyrýǵa járdemdesý jáne jumyspen qamtýdy qamtamasyz etý baǵytynda birqatar jumystar júrgizilýde. Qala boıynsha búginde 1343 adam (0,9 paıyz) jumyssyz esebinde tirkelgen. Bıylǵy jyldyń ótken merziminde bes bos jumys orny jármeńkesi ótkizilip, 262 adam memlekettik qoldaý sharalarymen qamtyldy.
«Jumyspen qamtý jol kartasy - 2020» memlekettik baǵdarlamasynyń 1-baǵyty boıynsha №39 orta mektep, №33 «Orlenok» balabaqshasy, kózi nashar kóretin balalarǵa arnalǵan mektep-ınternat ǵımarattaryna kúrdeli jóndeý jumystary bastalǵan. Bul úsh nysanda 45 jańa jumys orny ashylyp, osy nysandardaǵy qurylys jumystaryna 13 adam jumyspen qamtý ortalyǵynyń kómegimen jumysqa turdy. Baǵdarlamanyń 2-baǵyty «Kásipkerlik belsendilikti yntalandyrý» sheńberinde 54 adamǵa shaǵyn kásipkerlikti damytýǵa 158 mln. teńge qarajatqa suranys berildi. Óz isin ashýǵa yntaly 600 adamǵa túsinik-keńes berilgen. Kásipkerlikti keńeıtý jobalary boıynsha alty jeke kásipkerge 17,8 mln. teńge nesıe berilip, 45 adamnyń nesıelik qujattary jınalyp, «BQO aýyl sharýashylyǵyn qarjylaı qoldaý qory» AQ-ǵa joldanǵan. Sonymen qatar baǵdarlamanyń 3-baǵyty «Jumys berýshiniń qajettiligi sheńberinde oqytý jáne qonys aýdarý arqyly jumysqa ornalasýǵa járdemdesý» boıynsha 30 adam kásiptik oqýmen qamtyldy. 10 adam kógaldandyrýshy mamandyǵyna qaıta daıarlaýdan ótip, olardyń 9-y turaqty jumys tapty. Qazirgi ýaqytta derbes kompıýter operatory mamandyǵyna jeti adam oqýda. Odan basqa 13 adam bilimderin jetildirý jáne qaıta daıarlaý kýrstarynan ótýde.
Bıyl qala boıynsha áleýmettik jumys oryndaryn qurýǵa 108 adamǵa 12 mln. 591 myń teńge qarajat bólingen. Búginde 20 mekemedegi áleýmettik jumys oryndaryna 35 adam joldanyp, 31 mekememen 61 adamǵa jasalǵan kelisimsharttar merzimi uzartyldy. Jastar praktıkasyn uıymdastyrýǵa 245 adamǵa 48 mln. 939 myń teńge qarajat bólingen. Kúni búginge 161 adam 85 mekemege jastar praktıkasyna joldanǵan. 126 jas mamanmen jasalǵan kelisimsharttar uzartylǵan. Jastar praktıkasyn aıaqtaǵan 39 adamnyń 24-i nemese 61,5 paıyzy turaqty jumysqa ornalasqan.
Jármeńkege qatysqan jumys berýshiler negizinen elektrık, slesar, usta, aǵash sheberi, júrgizýshi, barlyq baǵyttaǵy ınjener, dáriger, medbıke jáne taǵy basqa bos jumys oryndaryn usyndy. Qaladaǵy tórt óndiris orny - 33, bir qurylys kásiporny - tórt, medıtsınalyq mekemeler - 124, tórt oqý orny - 20, 19 jeke kásiporyn 99 bos jumys oryndaryna, memlekettik mekemeler 11 mamandyq boıynsha jumys izdeýshilerden túıindeme qabyldady. Áleýmettik jumys oryndaryna eki kásiporyn 13 bos jumys ornyn, jastar praktıkasyna 10 uıym-mekeme 40 oryn usyndy. Sonymen qatar 2014-2015 jyldary «Jumyspen qamtý jol kartasy - 2020» baǵdarlamasy boıynsha nesıe alǵan 10 jeke kásiporyn jármeńkege óz ónimderin shyǵardy. Olardyń ishinde tosol jáne antıfrız óndirisi, aıaq kıim tigý, naýbaıhana, jylyjaı, temir buıymdary tsehtarynyń ónimderi kópshiliktiń qyzyǵýshylyǵyn týǵyzdy.
Óńirdegi qurylys ındýstrııasynyń betke ustar kompanııalarynyń biri «Batys Qazaqstan qurylys materıaldary korporatsııasy» AQ-nyń jármeńkege kelgen ókilin áńgimege tartqanbyz. - Bizge elektrmonter, ınjener-elektronshy, slesar kıpovshy, óndiristik oryndardy jınaýshy jáne ózgeleri qajet. Ázirge 10 shaqty adamnan túıindeme qabyldandy. Elektrmonterlerdiń kásibı biliktiligine (razrıadyna), tájirıbesine qaraı jumysqa qabyldaımyz. Olarǵa eńbekaqy saǵatyna qaraı tólenedi. Qazir zaýyttyń jumysy qalypty, - dedi atalmysh kompanııanyń kadrlar jónindegi bóliminiń mamany Tolqyn Dúısenova. Onyń aıtýynsha, kompanııa budan buryn da osyndaı jármeńkeden ózderine qajetti mamandardy tapqan kórinedi.
«Aq barys» JShS kompanııasy bos jumys oryndary jármeńkesinen keńse ákimshisin, kúkirtsýtegi boıynsha tehnık, sýpervaızer, arnaıy kólik (ekskavator) júrgizýshisi mamandaryn izdeıdi. Seriktestiktiń kadrlar jónindegi bóliminiń qyzmetkeri Saıash Hasanovanyń aıtýynsha, kompanııaǵa kúkirtsýtegiden qorǵaný máselesin biletin bilikti mamandar qajet, ásirese, aǵylshyn tilin biletin mamanǵa esik ashyq. «Kvant» JShS-ǵa aǵash sheberin, dızaıner, tehnolog, ekskavatorshy, býhgalter, santehnık, al «Oral transformator zaýyty» JShS-na jumysshylar, tran-sformator qurastyrýshy, júk tıeýshi qajet. «Elektr energetıkasynan habary bar, orta tehnıkalyq bilimi bar mamandardy jumysqa qabyldaımyz. 15 adam túıindeme tapsyrdy. Jumysqa qabyldanǵan mamandardy oqytý kýrstarynan ótkizemiz», - dedi kompanııa ókili Ásel Muhıtova.
«Batys Qazaqstan mashına jasaý kompanııasy» AQ-nyń ókili jumys kóleminiń ósýine baılanysty jumysshy mamandyqtaryna, elektronshylar, slesar, metallýrg, stanok operatory, frezırovshy jáne ózgesine túıindemeler qabyldady. «Bastysy, jumys tájirıbesi bolsa deımiz. Mundaı mamandardy jumysqa qabyldamas buryn áńgimelesýden ótkizemiz, sodan keıin úsh aıǵa synaq merzimimen eńbek kelisimshartyn jasaımyz», - dedi atalmysh kompanııanyń kadrlarmen jumys bóliminiń qyzmetkeri Elvıra Qońyrova.
Sonymen, bul jármeńke jumys isteımin deıtin adamǵa jumys tabylatynyn anyq baıqatty.
