Oralda bos qalǵan óndiristik ǵımarat órtendi
ORAL. QazAqparat - Oralda búgin bos qalǵan óndiristik ǵımarat órtendi, dep habarlaıdy QazAqparat tilshisi.
Batys Qazaqstan oblysy Tótenshe jaǵdaılar departamentiniń baspasóz qyzmetinen túsken málimetke qaraǵanda, bul jóninde habar saǵat 16.49-da túsken.
«Verhnıı týpık» kóshesindegi 1/1-mekenjaıynda «Oral metall konstrýktsııalary jáne tsınkileý zaýyty» AQ-ǵa tıesili bir qabatty ǵımarat otqa orandy.
1970 jyly salynǵan ǵımarattyń tóbesi men terezeleri (400 sharshy metr) jáne turmystyq qaldyqtar (200 sharshy metr) jandy.
Atalǵan ǵımaratty 2015 jyly sot oryndaýshylary jaýyp, satýǵa shyǵarǵan.
«Tilsiz jaý» saǵat 17.48-de oqshaýlanyp, 18.32-de aýyzdyqtaldy.
Oqıǵa ornyna 65 adam, 18 tehnıka, sondaı-aq jedel tergeý tobynyń 5 qyzmetkeri men 2 tehnıka bardy. Oqys oqıǵadan eshkim zardap shekpedi.
Qazirgi kezde oqıǵanyń jaı-japsary anyqtalyp jatyr.
